La aziende pai Servizis Sanitaris n. 3, sole Aziende Sanitarie regjonâl, e je stade premiade a Rome dal Osservatori Nazionâl pe salût de Femine
Ai 3 di Dicembar stât, li de Cjamare dai Deputâts a Rome, il Ministri de Salût al à assegnât ae ASS3 la cualifiche di "3 Bolins Rose" premiant la Aziende pal so impegn tal svicinâ la salût al mont feminin, massime tal ospedâl di Sant Antoni Abât di Tumieç.
Ce isal il Program ONDA?
L'Osservatori Nazionâl su pe salût de Femine (O.N.Da), nassût pe promozion e tutele de salût des feminis, al à screât tal 2007 il Program Bolins Rose indreçât a lumâ e premiâ i Ospedâi talians "vicins aes feminis", vâl a dî chês struturis che a furnissin percors diagnostics terapeutics e servizis cuintri lis malatiis feminîls plui impuartants dal pont di viste clinic e epidemiologjic, cun cetante atenzion aes necessitâts specifichis de utence rose.
Il program al è indreçât sedi a sburtâ la midisine di gjenar dentri dai ospedâi, element indispensabil par miorâ la cualitât e l'acès ai servizis; sedi a inviâ la metude in vore di une rêt di ospedâi "a misure di femine", indulà che chestis a puedin indreçâsi cernint, par mieç di un canâl di informazion privilegjât e trasparint, lis struturis che plui si confasin aes lôr necessitâts.
La esperience fate dilunc chescj cinc agns e à permetût di inzornâ dal dut il program, prontant un Bant di concors - pes struturis ospedaliris dal teritori nazionâl e ancje par chês di lenghe taliane tal forest – che al previôt un gnûf metodi di valutazion dai ospedâi fondât su criteris obietîfs e specifics.
I ospedâi, partecipants ae iniziative, a son stazâts e po dopo premiâts cu la assegnazion di bolins rose di 1 a 3, daûr dai servizis dâts fûr di chei reparts che a curin lis patologjiis specifichis femininis.
La gnove Vuide Nazionâl Bolins Rose in formât digjitâl, presint in passe 17mil farmaciis sul teritori talian, in plui che fâ cognossi i components dal gnûf network Bolins Rose, e je tant che un imprest concret e pratic che al permet aes feminis di podê sielzi lis struturis che a stimin plui dongje aes lôr necessitâts.
Tal gnûf sît www.bollinirosa.it, avodât ae iniziative e aes ativitâts a cheste peadis, si cjatin publicâts ducj i ospedâi premiâts, cui lôr servizis, spartîts par regjon, co e je ancje la pussibilitât di dâ un judizi partint de esperience direte di ognidun.
I CRITERIS PE ASSEGNAZION DI BOLINS E LA SITUAZION DE REGJON FRIÛL VIGNESIE JULIE
Chi sot i criteris pe assegnazion aes Struturis Ospedaliris di 1, 2 o 3 Bolins Rose valevui par doi agns:
- Presince di Unitâts Operativis che a curin lis patologjiis femininis specifichis: dentri de struture ospedaliere si cjatin Unitâts pe assistence e cure des patologjiis des feminis plui impuartants dal pont di viste clinic e epidemiologjic.
- Justece dal percors diagnostic terapeutic: metude in vore di nivei di cure e assistence bogns di sigurâ une buine gjestion de malatie, massime cun atenzion aes carateristichis psico fisichis e aes dibisugnis des feminis (servizis clinics).
- Posizionament de paziente al centri des curis: centralitât de femine e tutele de sô dignitât midiant la umanizazion des curis.
- Presince te Aziende Sanitarie di feminis in posizions di ponte.
Lis domandis dal cuestionari di valutazion a son stadis imbastidis di un grup multidissiplinâr di esperts, daûr des Liniis vuide dal Ministeri de Sanitât e de Societât Sientifiche e a ognidune a son stât dâts ponts, daspò di chest e je stade la assegnazion di 3 (massim), 2, 1 o nissun Bolin Rose.
Publicazion realizade in gracie dai contribûts de Leç n. 482 dai 15 di dicembar dal 1999 (Normis in cont de tutele des minorancis lenghistichis storichis) e cul supuart organizatîf de Direzion Centrâl Culture, sport, relazions internazionâls e comunitariis – Servizi Coregjonâi tal forest e lenghis minoritariis (Regjon Friûl Vignesie Julie).
stampa