In detai

September 4, 2018

Vigjilance sui farmacs

farmaci

I medisinâi a rapresentin un straordenari strument di cure e assistence pes personis maladis. Cun ogni probabilitât a son la ponte plui alte des ricercjis tecnologjichis che l'om al dì di vuê al è in grât di concretizâ. Cundut di chel elevât contignût sientific, i farmacs no son simpri cence efiets colaterâi plui o mancul grâfs. Par chest motîf e par contribuî a rindiju simpri plui sigûrs al è fondamentâl segnalâ eventuâi disturps potenzialmentri corelâts ae terapie.

Prime di jessi comercializât un medisinâl al è sometût a studis pre-marketing che a coinvolzin un numar limitât di pazients (par esempli a lassin fûr fruts e anzians) e a limitin la tipologjie di personis ingaiadis. I trial là che a vegnin testâts a àn ancje une durade plui curte rispiet al contest temporâl là che a saran dopo doprâts te pratiche cliniche. Infin, cuasi mai, a cjapin dentri pazients cun patologjiis diviersis di chês ogjet dal studi e di râr a son cjapâts dentri sogjets che a cjolin plui farmacs. Il mont là che a son sperimentâts duncje al è ben lontan di chel là che a saran doprâts.

Par chest motîf la maniere plui semplice par contribuî a rindiju sigûrs e je chê di segnalâ cualsisei suspiete reazion avierse. A puedin cussì jessi scuviertis o miôr rapresentadis in tiermins di frecuence lis reazions che in fase di pre-comercializazion no jerin vignudis fûr. Di chi si otignaran po dopo informazions par definî la utilizazion otimâl.

Par judâ la segnalazion spontanie, la Agjenzie Taliane dal Farmac e à metût cumò a disposizion une plateforme semplice e imediade di doprâ: colegantsi al sît: www.vigifarmaco.it al è pussibil segnalâ in pôcs minûts une reazion suspiete.

Par segnalâ nol è necessari vê la ciertece de relazion causâl tra event e farmac, ma al è suficient il suspiet clinic. Dome cuant che tantis segnalazions a converzin si gjenere un segnâl di atenzion che al sarà valutât tal detai dai esperts dal setôr.

Contribuî a rindi plui sigûrs i medisinâi disponibii cumò al è ancjemò plui sempliç e imediât in gracie de plateforme www.vigifarmaco.it .
Segnalâ une suspiete reazion avierse al jude a miorâ la salût di ducj, ancje la nestre.

Chi sot il tutorial pe segnalazion.

 

torne sù
ultime modificazion: September 4, 2018 Coments / Sugjeriments