Prisma 7
Il Friûl - Vignesie Julie al è al decim puest fra lis regjons plui "anzianis" de Union Europeane: il 26 % de popolazion al à plui di 65 agns. Par chest motîf si è pensât di promovi un percors di cognossince (screening), che al puedi rilevâ lis debilecis e mostrâ cuâi che a son i disturps o i discomuts sotvalutâts o pûr no ricognossûts. La finalitât e je chê di prevignî un peiorament dal stât di debilece, favorint cussì l’invecjament intune situazion di benstâ fisic e sociâl.
A cui che al è indreçât il screening
Il progjet di scandai al è clamât "Prisma 7", e al è indreçât ae popolazion anziane cun plui di 75 agns.
Ce che al è Prisma 7
Prisma 7 al è un cuistionari di siet domandis, elaborât di grups di ricercjadôrs universitaris dal Quebec (Canadà); al è za stât sperimentât in Ingletiere e in Italie cun risultâts otims. La rilevazion si fasarà midiant di une interviste telefoniche. Rispuindint a chestis domandis semplicis, la persone intervistade e judarà a orientâ i servizis e lis ativitâts de Regjon sui bisugns reâi de popolazion.
Ce che al è za stât fat e ce che si intint fâ
Il scandai al è za scomençât tal 2018 in forme sperimentâl in cuatri distrets de Regjon ("Valmaura" di Triest, "San Denêl", "Cividât" e "Vals e Dolomitis furlanis" di Manià), e al à tocjât plui o mancul 23.000 citadins. Inte sperimentazion, il 60% des personis contatadis al à rispuindût vulintîr aes domandis e, fra i intervistâts, il 38% al è risultât fragjil in maniere potenziâl.
Intal 2019, il scandai al è stât slargjât a dute la regjon.
Cui che al contatarà i anzians
Lis intervistis telefonichis a son fatis dai operadôrs dal Call center regjonâl pe salût. I operadôrs a clamin par cont dai distrets des Aziendis dal Servizi Sanitari Regjonâl; a doprin il numar telefonic 040-064783. Di chest stes numar, se al covente, la persone contatade o un so familiâr al pues ricevi sclariments sul motîf de clamade. Par eventuâls informazions si pues telefonâ di lunis a vinars des 9:00 aes 19:00.
Al moment dal contat telefonic, si spiegarà il motîf de interviste, si disaran cuâi che a son i recapits di riferiment dentri dal propri distret sanitari e, infin, si darà la informative sul tratament dai dâts personâi.
La interviste e dure plui o mancul 4-6 minûts.
I vantaçs par cui che al rispuint ae interviste
Oltri al fat di judâ la Regjon a capî cuâi che a son i bisugns reâi emergjents, tal câs che si rilevàs une situazion di fragjilitât potenziâl, i distrets sanitaris a podaran tornâ a contatâ la persone in maniere direte, di mût di podê fâ altris aprofondiments e cjatâ insiemi la maniere miôr par frontâ eventuâls dificoltâts.
Infin, se l'anzian lu permet, si mandarà il risultât dal scandai al miedi di medisine gjenerâl, che al furnirà il so contribût in chest percors di ricercje dal miorament de cualitât de vite.
Altris informazions su chest progjet si cjatin intal sît istituzionâl de Regjon.
- Sito Regione FVG (il link al vierç une gnove barconete)
stampa