In detai

February 22, 2019

Screât il pont ScambioLibro li dal Centri di Assistence Primarie di Buie

Buie
Buie

Si è davuelte vinars ai 8 di Fevrâr aes 9 la inaugurazion dal pont ScambioLibro li dal Centri di Assistence Primarie di Buie. Pal Comun a jerin presints il sindic, dot. Stefano Bergagna, la vicesindiche Silvia Pezzetta, l'assessôr ae culture Alberto Guerra e il bibliotecari Romano Martinuzzi. Pe AAS3 a jerin presints il vicecomissari straordenari pes Funzions Sanitariis, dot. Maurizio Andreatti, la diretore de Struture Relazions e Comunicazions, dot.e Olga Passera, il diretôr dal Distret 3, dot. Massimo Sigon, la coordenadore infermieristiche dal Distret, dot.e Donatella Righini.

La iniziative e nas de colaborazion fra il Comun di Buie e la AAS3 e si ispire ae esperience - che e je in vore za di 3 agns incà - de colaborazion AAS3-Comun di Glemone pal progjet Un Libro per un sorriso li dal Presidi Ospedalîr pe Salût di Glemone (7.500 libris "lavorâts").

L'obietîf al è di une bande promovi la leture te popolazion, di chê altre rindi plui "lizere" la spiete li dal CAP: ancje se si trate dome di une ricete, la spiete di une prestazion sanitarie e je dut câs dispès segnade di ansie e preocupazion, che la leture di un libri o di une riviste e pues slizerî.

Cemût funzionial? Lis personis a puedin cjoli il libri o la riviste che ur interesse e leile intant che a spietin. Ricevude la prestazion, a puedin decidi di:

- Tornâ a meti il libri o la riviste là che lu àn cjatât

- Puartâ a cjase la publicazion par finî la leture. In chest câs, libri o riviste a puedin jessi tornâts là che a son stâts cjapâts sù, o ancje te Biblioteche di Buie, o tal Pont di Informazions dal Presidi Ospedalîr pe Salût di Glemone.

Buine leture!

torne sù
ultime modificazion: February 22, 2019 Coments / Sugjeriments