FINALMENTRI O SOI VECJO! O PUES VÊ PLUI TIMP PAR ME!
Lis iniziativis dai servizis sociâi dai comuns de AAS n.3 indreçadis ai anzians
Fin pôc timp indaûr la vite e jere segnade di fasis ben definidis che a levin daûr la une cu la altre: la fase dal aprendiment, chê dal lavôr e de produzion, chê dal ripôs. La lôr secuence lineâr e consintive di ricognossi lis trê fasis come prime, seconde e tierce. Par chest, tacant di un ciert moment, si è ricognossude la vecjaie (ultime fase de vite) come la “tierce etât” (Renzo Scortegagna - Gjenerativitât Sociâl).
La “tierce etât” e je considerade soredut une fase di decjadiment, di pierdite sei di funzions, fisichis e mentâls, sei di rûl e di relazions significativis.
Studis recents, invezit, a modifichin cheste leture, proponint une gnove.
In gracie des cognossincis di plui tal cjamp medic-diagnostic, aes cundizions di vite mioradis, ae atenzion ae educazion ae salût (cu la promozion di stîi di vite sans, par esempli), si devente vecjos di plui (e je aumentade la sperance di vite: 81 agns pai oms e 85 pes feminis – dât Istat 2016) e plui in salût.
Il deventâ vecjos, duncje, nol è plui viodût come une malatie no vuaribile, ma come un timp de vite là che meti in valôr lis cognossincis e lis esperiencis acuisidis tal cors dai agns e doprâ il plui timp a disposizion par “imparâ a deventâ vecjos”, dant scolte ae cressite e al aument dal propri benstâ individuâl e sociâl e di chel dai altris.
Imparâ a deventâ vecjos al vûl dî coltivâ un ategjament mentâl che nus permet di cjapâ cure de nestre salût fisiche, modificant i compuartaments danôs e fasint i controi di routine, e mentâl, continuant a inricjî lis nestris cognossincis e competencis, partecipant a ativitâts formativis e di aprendiment, alimentant e curant la nestre vite sociâl par cimentâ il nestri sens di identitât e di apartignince e contrastâ il riscli di isolament.
Ma la persone anziane e impare a invecjâ no dome partecipant a variis ativitâts come beneficiarie, ma ancje colaborant ae progjetazion e ae realizazion di iniziativis culturâls, formativis, di socializazion, di prevenzion des malatiis, di promozion dai corets stîi di vite, di supuart a anzians fragjii e a lis lôr fameis.
Pensait, par esempli, ae difusion des Universitâts de Tierce Etât, aes numerosis associazions di volontariât fatis di personis anzianis, aes ativitât e ai volontaris che a supuartin i centris di agregazion pai anzians, a lis resintis iniziativis di vicinât solidari formâl e informâl.
Ancje la nestre Regjon cu la L.R. 22/2014 “Promozion dal invecjament atîf”, e ricognòs e e valorize “il rûl atîf des personis anzianis tes propriis comunitâts e la lôr partecipazion ae vite sociâl, civîl, economiche e culturâl, facilitant percors di autonomie e di benstâ fisic, mentâl e sociâl”.
In linie cu lis indicazions regjonâls, i Servizis sociâi dai Comuns des Unions Teritoriâls Intercomunâls de AAS 3 (Cjargne, Glemonàs, Cjanâl dal Fier-Val Cjanâl e Culinâr) a co-progjetin ativitâts di promozion dal invecjament atîf in colaborazion cui anzians dai varis teritoris e des associazions che ju rapresentin e ju sostegnin.
In Cjargne a son atîfs 18 centris di agregazion par anzians, difondûts in dut il teritori, gjestîts di anzians volontaris cul supuart dal animadôr dal Servizi sociâl dai Comuns, dal Auser di Comelians e dal Residence Stâts Unîts de Americhe di Vile di Cjargne.
A son vierts une volte par setemane il dopodimisdì, a son gratuits e a acès libar. Tai centris si fasin svariadis ativitâts condividudis daûr des voltis cui partecipants (manuâls, di moviment, esercizis par tignî il cjâf in alenament, jessudis culturâls tal teritori, zimulaments cun altris centris di agregazion) par mantignîsi il plui pussibil atîfs e passâ il timp in compagnie.
Tra pôc a saran organizâts grups di cjaminadis in cualchi comun, cu la pussibilitât di visitâ cualchi lûc di particolâr interès paisagjistic/culturâl dal teritori in colaborazion cui Carnia Greeters, Carnia Musei, il CAI e i volontaris dal teritori. I percors a saran diversificâts par permeti la partecipazion sei di personis abituadis a cjaminâ, sei di chei che a fasin un pôc di fadie, ma il pont di rivade al sarà il stes par podê gjoldi di un moment di socializazion. I percors a saran daspò publicâts e difondûts cuntune brochure.
Par informazions al è pussibil indreçâsi al animadôr Andrea Dorni al numar: 347.1773364.
Tal teritori dal Glemonàs, Cjanâl dal Fier e Val Cjanâl a son presints doi centris semiresidenziâi par anzians no autosuficients (Vençon e Pontêbe) e doi centris di agregazion (Mueç e Tarvis) gjestîts di personâl dal Servizi sociâl. Ai anzians che a frecuentin i centris semiresidenziâi a vegnin ufiertis, in plui di prestazions di caratar socio-assistenziâl, ativitâts di caratar socio-educatîf e di animazion. I centris a son vierts di lunis a vinars, des 8.00 aes 16.00 cirche.
I centris di agregazion a ufrissin ativitâts di socializazion, culturâls e espressivis. Il Servizi al supuarte ancje il centri di agregazion dal comun di Resie fasint ativitâts educativis e di animazion periodichis.
In colaborazion cui Comuns e il volontariât locâl, il Servizi al fâs ancje intervents di socializazion, animazion e formazion indreçâts ai anzians residents tal teritori.
Il Servizi al promôf il lavôr di rêt cu lis realtâts che a diviers titul si ocupin de popolazion anziane. Cu la preparazion de mostre «Colôrs cence timp», che e ilustre esperiencis e riflessions di anzians creatîfs là che il Servizi sociâl al à colaborât tal ambit dal progjet “Presints, come lis montagnis”, educadôrs e animadôrs a vuelin contribuî ae difusion di une divierse vision de etât anziane cu la intenzion di valorizâ lis risorsis e la partecipazion ative dai anzians.
Par informazions al è pussibil contatâ l’educadôr Roberto Foglietta ai numars 0432 989538 e 347 95177445.
Tal Culinâr cumò a son presints 3 centris di agregazion (Madrîs di Feagne, San Vît di Feagne e Trep Grant - al tacarà tai mês prossims ancje un gnûf pont di incuintri a San Denêl) a son autogjestîts e autofinanziâts, coordenâts e organizâts di volontaris cul supuart dal MoVI FVG, de Anteas FVG e di altris associazions che a operin in colaborazion cui Servizis Sociâi. A son vierts a ducj, gratuits e a ufrissin la pussibilitât di cjatâsi un dopodimisdì par setemane par condividi culture, cjants, moments religjôs, divertiment, zûcs di taule, gjitis, events smirâts e fiestis adeguadis condividudis cu lis richiestis dai partecipants.
A vegnin ancje organizadis gjitis tal teritori. In particolâr e je di prossime realizazion une gjite pai anzians dai centris di agregazion de zone culinâr, insiemi cui anzians dal Glemonàs e de Cjargne, par visitâ l'Hospitale di San Zuan a San Tomâs di Maian, un lûc che al jere une tape impuartante de Vie dal Tiliment, la vecje Vie di Alemagne, che e colegave i Paîs Baltics cui puarts dal Adriatic. Il sît, di ristruturazion resinte, timp indaûr al jere une “Stazion di soste” là che, in plui che cambiâ i cjavai, si podeve cjatâ ricovar, assistence, protezion e ripôs pe gnot su “disterminâts materàs di paie o di fen”
Al sarà, cun di plui, preparât un catalic di facile consultazion, cul elenc dai puescj di interès artistic/storic/culturâl de zone dal Friûl Culinâr e no dome chel, che al sarà a disposizion di ducj i centris di agregazion e che al furnirà informazions smiradis par podê efetuâ gjitis, visitis e altris robis.
Par informazions o podês contatâ la segretarie dal Mo.V.I. FVG al 0432/943002 (Carla).
torne sù
stampa