Ce isal il zûc di azart?
Cun zûc di azart si fâs riferiment a ducj chei zûcs là che:
1) E je previodude une pueste in bêçs (o in altris ogjets di valôr)
2) La vincite e je leade dal dut o pal plui al câs e no ae abilitât dal zuiadôr
Duncje si va des lotariis, ae roulette, aes corsis dai cjavai, al zûc dai dâts, aes scomessis, ai “grate e vinç”, al lot e superenalot, fin aes vuê tant difondudis “slot-machine”
Cuant nassial il zûc di azart?
Zuiâ di azart al è une abitudin umane une vore antighe, scomençade dal sigûr plui di 5000 agns indaûr.
Il zûc plui antîc di azart al è probabilmentri il zûc dai dâts: si zuiave in Egjit za intal 3000 prin di Crist.
Di fat, il non “azart” al derive propit dai dâts (“il dât” in arap si dîs “az-zahr”).
Parcè vuê isal deventât un probleme tant grant?
I gnûfs zûcs, tant che che lis slot-machine e i zûcs “on line”, a causin cun tante plui facilitât dipendence. Il sempliç “zûc di azart” al pues duncje deventâ une malatie (“zûc di azart patologjic”).
Di fat, tant che par dutis lis droghis, plui svelte e je la azion e la ripetitivitât, plui cun facilitât intal cerviel e tache la dipendence. Lis slot-machine (chês che ur disin “machinetis”) a permetin zuiadis une vore sveltis e ripetudis centenârs o miârs di voltis in pocjis oris, e duncje il pericul al è cetant alt.
Ancje zûcs une volte pôc pericolôs, tant che il lot, a son cambiâts par sburtâ la int a zuiâ simpri di plui. Il “10 e lot” par esempli, vuê al previôt 200 estrazions in dì, une ogni 5 minûts!
Tant pericolose e je vuê ancje la pussibilitât di zuiâ di azart in linie (su ordenadôrs, tablet o telefonut).
Cun di plui, a diference dal passât, cuant che si podeve zuiâ dome ai casinôs, cu lis gnovis leçs vuê ognidun, ancje se nol vûl, al pues cjatâ slot-machine e altris zûcs a pôcs metris di cjase. Di fat, la plui part des personis cun problemis di zûc di azart e à scomençât tai bars, magari lis primis voltis zuiant i minûts di rest, e no intune sale zûcs.
Trop si zuial in Italie?
Lis cifris a son in cressite continue. Dal 1990 a son cressudis adiriture di 100 voltis, di 0,7 miliarts a plui di 70 miliarts. In medie duncje, vuê ogni talian al zuie ben plui di 1000 euros ad an.
Cui devential dipendent?
Cuasi ducj i talians a àn, almancul cualchi volte, zuiât di azart. Dome intal 20% dai câs però il zûc al devente un probleme (15% di “Zuiadôrs problematics” plui 5% di vêrs e propris “Zuiadôrs patologjics”).
A son plui a pericul i masclis (ma la percentuâl di feminis e je in cressite continue) e cui che al à altris problemis di dipendence, tant che par esempli chei cun problemis di alcolisim.
Dutis lis etâts a puedin jessi coinvoltis, de adolessence (dulà che il zûc di azart al è un dai tancj compuartaments zovins di ricercje di “emozions fuartis”) fin ae vecjaie (dulà che, specie par cui che al è restât bessôl, zuiâ al è un dai mûts par “impiâ” une vite masse vueide e smamide).
Cemût si saltial fûr?
Prin di dut si à di saltâ fûr de ilusion di podê prime o dopo recuperâ lis pierditis, capî che i problemis nassûts cul zûc si risolvin dome abandonantlu dal dut, acetâ che - come par dutis lis dipendencis - jessî di bessôi nol è facil e, duncje, domandâ aiût.
La ufierte di tratament e cjape dentri:
• Colocuis iniziâi di valutazion
• Supuart psicologjic individuâl e familiâr
• Supuart psichiatric là che al è necessari
• Psicoterapie di grup indreçade ai zuiadôrs e ai lôr familiârs
• Supuart sociâl pai problemis economics
• Poie inte gjestion dai bêçs (“tutorât economic”), cuant che la disponibilitât e compuarte un pericul ecessîf di ricjadude
Contats utii
Se o pensais che voaltris, o un vuestri cjâr, o vedis bisugn di aiût o di un consei, par un colocui di valutazion (gratuit, risiervât e cence dibisugne di impegnative) o podês contatâ il Dipartiment des Dipendencis de AAS 3 “Friûl de Alte – Culinâr – di Mieç”:
- a Tumieç, vie Papa Giovanni XXIII, riferiment assistente sociâl Danila Canta, tel. 0433 – 488385. Inte stesse sede si fasin i incuintris terapeutics di grup
- a Glemone, Vie Battiferro 15, riferiment dotôr Giovanni Canzian, tel. 0432 – 982312
- a San Denêl, Viâl Trento Trieste 33 (tal repart di alcologjie), riferiment assistente sociâl Noemi Sfiligoi, tel 0432--949345
- a Codroip, viâl Duodo 82, riferiments dotore Katia Bolelli e dotore Paola Gosparini, tel 0432 – 909147
Il colocui al è gratuit e risiervât; no covente impegnative.
stampa