Dipendence dal Alcul

alcol

L’alcul e je la droghe plui antighe cognossude dal om: bevandis alcolichis si produsevin za te  preistorie, e i oms a’nd àn simpri preseât i efiets, e intes sôs variis formis (vin, bire, superalcolics) l’alcul al è presint in dutis lis culturis, in dutis lis fameis, in dutis lis ocasions, cuasi come un amì che nus acompagne vie par dute la vite.

Però l’alcul al pues jessi ancje un pericolôs nemì, pe nestre salût e pe cualitât de nestre vite e des nestris relazions.

Une vore tantis a son lis malatiis causadis dal alcul, cualchidune cognossude, come i dams al fiât o al cerneli, altris tant di mancul, come par esempli il tumôr al sen tes feminis (tancj no san che l’alcul al è un potent cancerogjen).

Ancje la mortalitât e je elevade, ancje se diminuide rispiet al passât cuant che i consums a jerin plui alts (vuê i muarts di alcul in Italie a son cirche 25.000 al an).

L’alcul al è ancje une grande cause di soference pes fameis, e lu san ben ducj chei che a àn scugnût convivi cuntun parint alcolist.

L’alcolisim al puarte a rompi i leams sociâi, a pierdi il lavôr, a compuartaments pericolôs par se e pai altris, a problemis legâi, ae puaretât.

Ancje il sempliç abûs ocasionâl al puarte a tantis vitimis su la strade, sul lavôr, tal ambient di cjase.

Considerant ducj chescj dams sei pal bevidôr che pe societât, l’alcul al è considerât de Organizazion Mondiâl de Sanitât la plui pericolose des droghis.

Cul timp, cuasi cence visâsi, l’abûs frecuent al devente spes dipendence, o sei une cundizion là che cui che al bêf al à pierdût la libertât di decidi se e cuant bevi, e par trop che si sfuarci dificilmentri al rive a vignî fûr di bessôl.

Se l’alcolist al bêf tant ogni dì, cul timp la dipendence e pues deventâ ancje fisiche, cun problemis di astinence lizêrs (tremaçs, agjitazion, insonie) o ancje une vore grâfs (confusion, alucinazions, crisis epiletichis) che a vegnin fûr cuant che il consum al ven interot.

Però si pues jessi alcoliscj ancje bevint in maniere iregolâr (a lis fiestis, tal weekend). In chescj câs la persone e pues stâ ancje tancj dîs cence bevi (iludintsi duncje di no jessi dipendente), ma cuant che e tache a bevi no rive a fermâsi ancje cuant che sal jere prometût, cun gravis consecuencis (barufis, incidents, problemis legâi, violencis domestichis) pal fuart stât di alterazion.

Lis stradis par vignî fûr a son, bisugne però savê ricognossi il probleme, ameti la incapacitât di smeti di bessôi, e domandâ aiût, al propri miedi, ai servizis di alcologjie, a lis associazions di volontariât (Alcoliscj Anonims, Club Alcoliscj in Tratament).

Par cui che al vûl domandâ aiût a un servizi di alcologjie, il tratament al è a gratis, risiervât, cence necessitât di impegnative.

Inte ASS n°3 il servizi di alcologjie al à cuatri sedis: Tumieç (tel 0433-488385), Glemone (tel 0432-982312), San Denêl (tel 0432-949345), Codroip (tel 0432-909147). Se o volês un aiût, o ancje dome par un consei, telefonait par domandâ un apontament.

Se cui che al bêf nol è ancjemò pront par domandâ aiût, i familiârs a puedin in ogni câs contatânus ai stes numars, par un colocui là che si pues individuâ cui operadôrs lis pussibilis strategjiis di intervent, o ancje par ricevi daurman un sostegn psicologjic e sociâl pes lôr dificoltâts.

In ogni câs, sei che o vedis il probleme, sei che o sedis un familiâr, la robe impuartante e je di no pierdi timp: l’alcolisim e je une malatie progressive, plui timp si spiete, e plui grâfs a son i dams.

torne sù
ultime modificazion: April 11, 2018 Coments / Sugjeriments