Telefons celulârs e radiazions eletromagnetichis
La Agjenzie Internazionâl pe Ricercje sul Cancar di Lion (IARC) e à anunziât ai 31 di Mai dal 2011 che un grup di 31 sienziâts esperts di radiazions eletromagnetichis e che a vegnin di 14 paîs, si è dât adun a Lion par valutâ i risultâts di ducj i studis za publicâts, indreçâts a aciertâ "il pericul cancerogjen potenziâl dovût ae esposizion a cjamps eletromagnetics a radiofrecuence" (par intindisi, chei provocâts des radiazions no jonizantis mandadis fûr di telefons cence fîi, ma ancje di segnâi radio televisîfs, di radars e di fors a microondis).
I risultâts di cheste analisi aprofondide a son stâts publicâts intune monografie de IARC e su la riviste The Lancet Oncology al prin di Lui.
Il grup di lavôr "al à classificât i cjamps eletromagnetics a radiofrecuence tant che pussibilmentri cancerogjens pai oms (grup 2B), su la base di un cressût pericul di disvilupâ un gliome, un tumôr trist dal cerviel, associât al ûs di telefons cence fîi".
Par capî il significât al è impuartant sclarî ce che a significhin i tiermins doprâts. Il grup 2B al cjape dentri chei che ur disin "pussibii" cancerogjens: al è un grant insiemi di sostancis e agjents sot osservazion, che cumò no son ritignûts ni cancerogjens "probabii" (grup 2A), e nancje cancerogjens "cierts" (grup 1). Par meti lis robis in prospetive, il grup 2B al cjape dentri ancje il cafè.
Al è impuartant ancje notâ che i tumôrs al cerviel e al sisteme gnervôs a son une vore rârs: la basse incidence a nivel mondiâl, atestade sui 3,5 câs ogni 100.000 abitants, al rint i studis tant incierts. In ogni câs, viodude la incidence tant basse, ancje un eventuâl pericul aumentât al compuartarès a nivel individuâl une incressite minime de probabilitât di disvilupâ un tumôr di chest gjenar. La segnalazion de IARC e à un significât in tiermins di salût publiche, dal moment che chei che a doprin i celulârs tal mont a son stimâts in plui o mancul 5 miliarts, o ben une persone su doi.
Lis conclusions a indichin la strade che e je propit daûr a fâ la IARC: par capî miôr la entitât dal pericul, si scuen "monitorâ cun atenzion la associazion fra l'ûs dai telefons celulârs e il pericul di tumôr (…) puartant indevant altris ricercjis a lunc tiermin, in particolâr su cui che al dopre a fuart i telefons celulârs".
Par esempli, un studi davuelt in Danimarcje l'an dopo dopo de jessude de monografie de IARC nol à cjatât nissune corelazion tra l'aument dai tumôrs dal sisteme gnervôs centrâl e l'ûs dai telefons celulârs, ma al covente continuâ a studiâ intal timp i efiets di cheste abitudin.
Inte spiete di risultâts plui cierts, la IARC e sugjerìs di "ridusi la esposizion, doprâ i auricolârs e scrivi sms" ogni volte che si pues evitâ une telefonade. La cautele e je tant impuartante pai zovins, che a àn tiessûts cerebrâi plui sensibii di chei dai adults e che, a diference di chei plui anzians, a àn denant dute une vite di esposizion.
INDICAZIONS OMS
Intai ultins vincj agns a son stâts fats tancj studis par valutâ se i telefons mobii a compuartin pericui potenziâi pe salût.
A vuê, secont l’OMS, nol è stât dimostrât nissun efiet sanitari aviers causât dal ûs dai telefons celulârs, ma altris ricercjis a son in cors par jemplâ lacunis che a son restadis intes cognossincis.
In particolâr, lis evidencis sientifichis disponibilis cumò a tindin, intal lôr complès, a lâ cuintri la ipotesi che l'ûs dai telefons celulârs al compuarti une incressite dal pericul di tumôrs intracranics.
Di chê altre bande, no son osservazions ancjemò disponibilis a distancis superiôrs di 15 agns dal principi dal ûs, e par esposizions tacadis te infanzie e te adolessence. Si che duncje, in linie cun ce che al ven racomandât de OMS, al è oportun lâ indevant cul control epidemiologjic dal andament dai tumôrs cerebrâi intal timp e cui studis di coort prospetics cumò in cors.
INDICAZIONS DE FEDERAZION DAI MIEDIS PEDIATRIS
Un probleme duncje za di timp ogjet di studi, viodût il grant numar di celulârs su dut il teritori, e viodût l’ûs, dispès ecessîf, che a ‘nt fasin ancje i fruts. Fin cumò il mont de pediatrie, in assence di provis sientifichis dimostradis, al veve conseât un ûs prudent di chescj dispositîfs, almancul tra i fruts, soredut evidenziant i aspiets sociâi dovûts al ûs impropri (a scuele, in lûcs publics, la dipendence dai SMS e des chat).
La Fimp e invide a aplicâ il principi de “precauzion”, metint in pratiche cualchi atenzion par evitâ une esposizion ecessive ai cjamps magnetics, “in spiete che l’Oms al puedi dâ indicazions plui curadis su la sigurece di chestis aparecjaduris”, al sclarìs il president de Fimp, Giuseppe Mele. “No son racomandazions sientifichis – al rimarche Mele – ma a son 'conseis' che o lassìn al sintiment des fameis”.
“Di un pont di viste tecnic, i celulârs, cussì come i fors a microondis e altris dispositîfs eletrics di ûs comun, a mandin fûr radiazions no jonizantis, duncje masse debilis par prejudicâ in maniere direte il DNA e causâ il cancar”, e osserve la Federazion dai pediatris, sclarint che “duncje, il mont sientific al à simpri evidenziât che nol esist a vuê un mecanisim biologjic cognossût che al sclarissi cemût che lis radiazions no jonizantis a puedin provocâ il cancar o altris problemis fisics”.
Ma devant dal suspiet solevât de Oms, ve i vot conseis dai pediatris par evitâ une esposizion ecessive leade ai cjamps eletromagnetics mandâts fûr di celulârs e di tantis altris aparecjaduris modernis:
- No stait a doprâ cuviertis eletrichis o altris dispositîfs eletrics dulà che o durmîs (par esempli la lûs noturne sul comodin).
- Controlait dulà che si cjate l'interutôr centrâl e il salvevite e no stait a durmî dongje di chel.
- No stait a passâ masse timp dongje di aparecjaduris eletronichis impiadis (par esempli la svearine sul comodin).
- No stait a lassâ che i fruts a cjalin la mangjative intant che e cuei dentri dal for a microondis.
- Tignît il router wi-fi il plui pussibil lontan dai vuestris familiârs, metintlu intun scansel o intun armaron.
- Tornait al telefon fis e diliberaitsi dal telefon cence fîl in cjase.
- No stait a dâ i celulârs ai fruts.
- Doprait un auricolâr a fîl e no un dispositîf bluetooth.
Sîts di interès:
Notis finâls:
- Altris efiets di iradiazion di altre origjin (no jonizantis, no cjamps EM): lûs blu
- Lis frecuencis di 410 nm dal spetri de lûs visibile a puedin jessi danosis pe retine
- Prevenzion dai efiets di lûs blu: schermaduris cun App di podê scjariâ a gratis
Dot. Maurizio Treleani A.A.S. n. 3 Friûl de Alte – Culinâr – di Mieç” – Otubar dal 2016
torne sù
stampa