Conseis utii par conservis fatis in cjase, buinis e "siguris”

Lis conservis a son lis preparazions alimentârs (la passade di tomât, il pest, i sot vueli, i sot asêt, le confeturis di pomis, la zardiniere…) confezionadis in contignidôrs a sieradure ermetiche che a subissin trataments termics parcè che e sedi pussibile la lôr conservazion par periodis luncs a temperadure ambient.

In chestis preparazions “sot vueit” si cree un spazi di teste dentri dal vasut là che nol è ossigjen e chest al è l’ambient ideâl pe sorevivence dal bateri Clostridium Botulinum.

Chest microorganisim in fat al vîf in assence di ossigjen e al prodûs sporis che a puedin resisti al ambient esterni ancje par un lunc periodi e lis tossinis che al prodûs a puedin puartâ al svilup di une malatie paralizante: il botulisim.

Il botulisim alimentâr al pues colpî individuis di dutis lis etâts e nol è trasmissibil di persone a persone. I sintoms a son chei tipics di une paralisi neurâl: sturniment e sdopleament de viste, ralentament e dificoltât di espression, fadie intal gloti, secjece de bocje, debilece muscolâr. Chescj sintoms, par solit, si manifestin une vore veloçs: di pocjis oris a pôcs dîs de ingjestion de tossine (di 6 oris a 15 dîs). Il tratament al è pussibil dome cu la soministrazion di une antitossine intes primis oris de comparse dai sintoms e il recupar al è une vore lent.

Par limitâ i risclis o vin di tignî a ments cualchi precauzion:

Igjiene personâl e de cusine: il sempliç lavament des mans cul savon al pues jessi suficient, baste che al vegni fat prime di scomençâ la manipolazion dai aliments, cuant che si cambie tip di preparazion, dopo vê doprât il bagn e dopo vê manipolât aliments crûts o tocjât animâi, scovacis e v.i.
Imprescj: pe preparazion des conservis il veri al è il materiâl miôr. Se al reste dal dut intat, al pues jessi lavât ancje in lavemassarie, “sterilizât” e doprât di gnûf.
Sielte dai ingredients: l’ideâl al è sielzi simpri prodots di stagjon. Se si doprin i prodots dal propri ort, si consee di preparâ lis conservis dentri di 6-12 oris de racuelte. In câs contrari al è ben conservâ lis materiis primis in frigorifar fin al moment di doprâlis. L’asêt al à di jessi di vin, miôr se blanc. Il vueli di primissime cualitât, miôr se extravergjine di ulive. Pal zucar, si consee il semolât, che nol altere il savôr des pomis, o un zucar par confeturis che al conten ancje la pectine. Pes conservis sot sâl, invezit, l’ideâl al è il sâl di mâr.
Selezion e lavament dai prodots: lavâ pomis e verduris sot aghe corinte in mût di eliminâ lis parteselis di tiere e altris residuis. La imersion par cualchi minût in aghe cul bicarbonât di sodi e pues jessi utile par ridusi i rescj di pesticidis de superficie esterne dai vegjetâi.
Sanificazion dai contignidôrs: lavâ a altis temperaduris i contignidôrs e i tapons e suiâju prime dal jemplament se la conserve e previôt di doprâ vegjetâi a crût, o ben lassâju dentri de aghe bolinte fin al jemplament se la conserve e previôt di doprâ un prodot cuet.
Jemplament dai contignidôrs: no van mai jemplâts fin al ôr, ma al è necessari lassâ un spazi libar indispensabil parcè che dentri dal contignidôr si fasedi il vueit.
Pasteurizazion des conservis: meti dentri dal dut i contignidôrs in aghe. Cuvierzi la pignate cul tapon e fâ bulî la aghe lassant bulî par almancul 20 minuts.
Ispezion dai contignûts: cuant che i contignidôrs a saran ben disfredâts, i tapons o capsulis di metal a varan di jessi un pôc ingjavâts. Scliçant cul dêt tal mieç dal tapon no si à di sintî il famôs “click clack”.