Tumôrs dal ingjâf orâl
EPIDEMIOLOGJIE (difusion e causis dal insorzi)
I tumôrs dal ingjâf orâl a son une vore difondûts in dut il mont, ma cun impuartantis diferencis gjeografichis. Tal prin si cjate la Indie (là che il tumôr dal ingjâf orâl al rapresente il 40% di ducj i tumôrs, e al è corelât cul ûs di mastiâ coculis di Betel), ma ancje in Europe al presente une frecuence elevade, soredut in Irlande, Gjermanie e Italie. In Italie i gnûfs câs ogni an a son cirche 12,5 ogni 100000 abitants (la medie mondial e je di 9 e chê europeane di 13.1) e i câs plui numerôs si cjatin tal Triveneto. La etât di vite plui esponude al svilup di chescj tumôrs e je la fasse di etât comprendude tra i 50 e i 60 agns cuntune piçule prevalence pal gjenar masculin.
I fatôrs di pericul, aromai cognossûts di timp, a son rapresentâts di lesions precancerosis dal ingjâf orâl, fum, alcul, igjiene orâl scjadinte cun carence di vitamine A, protesis dentariis traumatizantis e microtraumis in gjenar de bocje, esposizion a fatôrs cancerogjens, diete puare di pomis e verduris, esposizion a cualchi infezion virâl. Chescj fatôrs se presints tal stes moment a aumentin in maniere esponenziâl la pussibilitât di evoluzion in neoplasie.
Dispès la comparse de malatie tumorâl e je precedude dal insorzi di une precancerosi.
Par precancerosi dal ingjâf orâl si intindin lesions de mucose de bocje tant che leucoplachiis, eritroplachiis, lichen, fibrosis sot de mucose e lesions coreladis cu la anemie di Fanconi. Lis plui gravis a son par sigûr lis primis trê.
La leucoplachie si presente come une magle di aspiet blanc-perlât di variis dimensions, infiltrazion e difusion, cun percentuâls di trasformazion triste dal 15-20%.
La eritroleucoplachie e aparìs come une lesion di colôr ros vîf, viludade, cun margjins e superficie variabii e cualchi volte sanganade cuntune alte pussibilitât di trasformazion triste (cirche il 90% dai câs).
Il lichen planus al è presint soredut tes mucosis de bocje, struture reticolâr di aspiet blancjiç, al à une basse probabilitât di trasformazion neoplastiche (2-5%), che e prevâl in sogjets che a abusin di fum e alcul.
Il procès che al determine l’insorzi di une neoplasie al à simpri origjin di un dam iniziâl tal DNA des celulis, che lis trasforme in “potenzialmentri neoplastichis”, vâl a dî cuntune plui alte probabilitât rispiet a une celule normâl di dâ origjin a une trasformazion tumorâl. Su chestis celulis dal principi alteradis a agjissin daspò fatôrs cancerogjenetics, che a lescjin un procès di proliferazion no controlade di cressite neoplastiche. E esist une predisposizion gjenetiche familiâr, ma i plui impuartants fatôrs carcinogjenetics a son il fum e l’alcul.
Fum. Dutis lis sostancis (benzopirene, benzoantracene, nitrosaminis, pirene e naftalene, aminis aromatichis, composcj radioatîfs) presints tal fum a son nocivis e in grât di lescjâ in maniere divierse la comparse di un tumôr. Si dividin in doi grancj grups: idrocarbûrs aromatics policiclics e nitrosaminis. I prins a son atîfs dopo di vê subît un procès di idrossilazion a nivel dai microsoms celulârs. Cuant che il tabac al bruse si svilupin ancje lis nitrosaminis che la principâl e je la nicotine (amine secondarie) e chê altre la nornicotine (amine terziarie). L’acit nitrôs, simpri presint tal tabac, al agjìs di agjent nitrosant e al trasforme la nicotine in nitrosonornicotine, che e à une discrete ativitât cancerogjene. De pirolisi di cualchi proteine dal tabac si formin lis aminis aromatichis (benzidine e betanaftilamine) che a vegnin trasformadis in cancerogjens dentri dal organisim. Come composcj radioatîfs o cjatìn olmis dal 210P0, un nuclide che al emet radiazions alfa e che al à un timp di smiezament une vore lunc, presint tal fum di sigaret, e il poloni presint invezit tal fum di tabac. Ancje il tip di tabac al è impuartant: il tabac scûr doprât pai zigars e pes pipis al determine un dam dopli rispiet al tabac clâr; cun di plui il pericul al aumente se il tabac al ven mastiât, tignût in bocje (“snuff-dipping” difondût tal nord Americhe) o fumât al contrari (cu la bore dentri de bocje, ûs difondût in Sardegne). La masticazion dal tabac e je ancjemò une vore difondude intai paîs dal tierç mont, come par esempli la Indie, là che di fat la incidence dai tumôrs dal ingjâf orâl e je la plui alte tal mont. I dams da fum a son dipendents sei de dose (n° di sigarets fumâts) tant che de durade (par trop timp si fume). Si è viodût che personis che a fumin fin a 20 sigarets in dì a àn bisugne di 15 agns cence fum par vê i stes pericui di une persone che nol à mai fumât; invezit par cui che al à fumât plui di 20 sigarets in dì il pericul, ancje se une vore ridusût cul passâ dal timp, no si azere plui par dute la vite.
Alcul. Al è aromai dimostrât un rapuart dose/efiet tra consum di alcolics e svilup di carcinomis dal ingjâf orâl. L’alcul al agjìs in doi mûts: come agjent cancerogjen su la mucose dal ingjâf orâl (dam al DNA de celule) e come efiet secondari determinât des alterazions al sisteme imunitari e dal dismetabolisim che a vegnin fûr par cause de epatopatie croniche alcoliche. La cumbinazion di fum e alcul e dople la pussibilitât di svilupâ un tumôr, tant di jessi presinte in cirche il 75% dal totâl dai tumôrs dal ingjâf orâl.
Scuilibris di carence. Gjeneralmentri a son presints tai pazients etiliscj: iposideremie (fier bas tal sanc), anemie sideropenicche (di carence di fier), carence di vitaminis dal grup B, A e C e carence di oligoelements (seleni, zinc, ram). In chescj câs si svilupin des alterazions mucosis impuartantis che si trasformin in lesions precancerosis.
Traumis dentaris. I traumis de mucose orâl a puedin jessi determinâts de presince di dincj iregolârs par abrasion o carie, coronis o oturazions cun margjins che a debordin e che a tain, puints o protesis parziâls cun gançs mal modelâts, facetis di porcelane rotis o mancjantis, lidrîs dentariis che a tain, aparâts protesics imprecîs o mal fats, dincj ectopics o in brute posizion. In ducj i câs si ven a creâ une alterade reativitât dal tiessût che si trasforme in alterazion preneoplastiche de celule, nomenade “displasie”. A chest si zonte la male igjiene orâl, che e determine il svilup di une flore bateriche cancerogjene.
Fatôrs infetîfs. Cualchi bateri, presint soredut tai câs di male igjiene orâl, al trasforme sostancis inocuis presintis te salive (nitrîts e aminis) in sostancis danosis che a penetrin e a danezin la mucose (nitrosaminis, favorinis). Tra i virus chei in cause a son ceps de famee dai Herpesvirus e Papovavirus.
CLINICHE
Aspiet dal tumôr. La forme plui frecuente tal principi e je chê “micropapulâr”, ma e tint in maniere rapide a cressi e a trasformâsi intune forme clamade “vegetante”( che e à l’aspiet di un cauliflôr) o intune forme ulcerade. E Tint ancje in maniere rapide a infiltrâ i tiessûts e lis struturis di sot (muscoladure, vues) fin a difondisi lunc il sisteme linfatic, interessant par prime lis linfoglandulis dal cuel (prime stazion linfatiche) e dopo a seguî chês plui distantis (toraç, adom).
Prevenzion/ diagnosi. Une vore impuartante e je la prevenzion, evitant ducj i fatôrs di pericul elencâts parsore. Intai câs là che, magari cussì no, al sedi la presince dai fatôrs di pericul, e va fate une diagnosi di tumôr biel prest pussibil. Par chest motîf a vegnin fatis des visitis ambulatoriâls, nomenadis “di screening”, a cadence par plui anuâl (timps plui curts a vegnin definîts dal specialist ORL). Intai câs suspiets e ven subite programade une biopsie de lesion e in base ae diagnosi dute une serie di aciertaments radiologjics che a cambiin daûr de lesion e de sô estension (TAC dal ingjâf orâl, dal cuel e dai distrets plui distants tant che toraç e adom, studi des struturis dai vues cun TAC-Dentalscan, Ecografiis eventualmentri cun agoaspirât e analisi des celulis dal licuit). Intai câs che il tumôr al fos za presint in passât e duncje nus cjatìn di front al suspiet di “recidive di tumôr”, o podìn avalêsi ancje di altris esams tant che RMN e Tc-PET.
TERAPIE
La terapie no si pues standardizâ, ma e varie di câs in câs daûr de sede e de estension dal tumôr. Te plui part dai câs, cuant che al è pussibil, par dimensions dal tumôr e cundizions gjenerâls dal pazient, al ven praticât un tratament chirurgjic. Chest tratament al pues jessi fat de bocje (transorâl) cence interuzion dal vues de massele (nomenât juste apont “conservatîf”) o ben al pues previodi la asportazion ancje di une part di vues de massele interessade dal tumôr (nomenât in tal câs “demolitîf”) o dome di une sô interuzion par podê rivâ al tumôr (“transmandibolâr”). I trataments chirurgjics si fasin li dal Presidi Ospedalîr di Tumieç, a part i câs un vore complès dulà che lis necessitâts di ricostruzion a previodin l'intervent di dôs scuadris cu la zonte dai chirurcs plastics, che la scuadre ORL de ASS3 e lavore in colaborazion te sede di riferiment di Udin.
In alternative ae chirurgjie o, cualchi volte, in associazion e ven doprade la radioterapie. Tal ingjâf orâl, tes lesions distantis dal vues, e pues jessi doprade ancje une tecniche particolâr di radioterapie nomenade brachiterapie, che e consist tal posizionâ in maniere temporanie dentri de lesion tumorâl gusielis di Iridi radioatîf.
Dulà fâsi visitâ: ambulatoris ORL
I ambulatoris dulà podê fâsi visitâ a son distribuîts in dut il teritori de AAS3. Miedis Specialiscj ORL in servizi tal Repart ORL di Tumieç, a visitin li dai ambulatoris divisionâi tal Ospedâl di Tumieç, Glemone e San Denêl. Cun di plui miedis specialiscj ORL esternis convenzionâts a visitin li dai ambulatoris di San Denêl e Codroip. Su suspiet fondât, stabilît dal Miedi di Medisine Gjenerâl, la visite otorinolaringoiatriche e pues jessi domandade cun prioritât B (dentri di 10 dîs – nô o rivìn in medie a garantîle intune o plui des sedis citadis parsore dentri di 2-3 dîs).
torne sù
stampa