RUSSAC E SCUELE
Cul tacâ la scuele elementâr, il frut si cjate inte situazion di vê di stâ sentât par timps luncs e continuâts, un aspiet che fin in chê volte salacor nol veve mai sperimentât. Cheste gnove carateristiche de sô vite si coloche a cjaval tra il cressi svelt dai agns prime, e il cambiament prepuberâl futûr. Al è duncje naturâl che al puedi jessi cualchi disecuilibri su la colone, sui braçs e su lis gjambis.
Al è in chest moment de vite che si puedin cjatâ i prins episodis di mâl di schene ancje intai fruts, e i gjenitôrs a son incierts su lis posturis justis pal studi e preocupâts dal pês dal russac pe scuele. Il mâl di schene dispès al è imputât al solevament e al traspuart dal russac di scuele, ancje se la relazion e reste a vuê di dimostrâ cun studis avonde afidabii. Probabilmentri, la cjame su la schene e contribuìs al dolôr vertebrâl, stant che e determine fature muscolâr, e di fat si osservin plui câs di rachialgjie intai fruts sedentaris e duncje pôc fuarts.
Un dât al è confermât dal sigûr: il russac nol provoche la scoliosi e la schene arcade.
Par ce che al rivuarde lis posturis, dal sigûr ce che al pues puartâ ae comparse dal dolôr al è il restâ par oris inte stesse posizion sbaliade. A scuele, il frut dispès al cjape une posture disinlineade par tignî il sfuei intant che al scrîf, par stâ comut, o par cualchi probleme visîf iniziâl. Lis posturis plui scoretis e mantignudis par tant timp no son dome intes oris scolastichis ma ancje cuant che il frut al fâs i compits a cjase o intai moments di relax, cjalant la tv o il tablet. In chestis oris di ricrei, dal sigûr il frut nol varà chê di stâ sentât, ma pluitost distirât sul flanc o in posizions asimetrichis e fantasiosis par tiere, sul divan o sul jet. Cuant che si sta sentâts masse timp nol è pussibil mantignî simpri une posizion corete e, dal sigûr, si assumin posizions faladis che a puedin provocâ mâl di schene.
Par mantignî une posizion corete intant che si scrîf, si à di inclinâsi un pôc indenant fasint jeve su la articolazion dal ombul.
Figure 1 - la posizion corete par scrivi e je chê di sentâsi sui ischis, inclinantsi indenant fasint jeve sul ombul
torne sù
Figure 2 - restant sentâts par masse timp, si assumin par fuarce posizions scoretis
Al va ben cambiâ dispès lis posizions par eliminâ il cumul di tension, alçantsi impins, cuant che al è pussibil, o distirantsi cui comedons sul banc o poiantsi al schenâl.
Figure 3 - distirâsi ogni tant al ridûs la pression sui discs intervertebrâi
Par fâ i compits scrits si à di stâ sentâts, ma par studiâ e par lei si pues ancje distirâsi inte posizion de “sfingje”
Figure 4 - si pues ridusi il timp che si passe sentâts, studiant distirâts inte posizion de sfingje
Russac o trolley: cemût sielzi
Il russac al à di vê ciertis carateristichis: la “taie” e à di jessi proporzionâl al cuarp dal frut, al à di vê une cinture adominâl, il schenâl al à di aderî ae schene, e al à di jessi rigjit e imbotît, la mantie solide, resistente e comude, lis braçadoriis largjis e sfodradis. Altris aspiets che a incidin a fuart su la schene a son il cemût che si lu jemple e il cemût che si lu met. Dispès i fruts a puartin a scuele ancje ogjets che no coventin e soredut a jemplin il russac fin al ultin soflet disponibil creant un aument fuart de distance de cjame dal baricentri corpori. Chest al compuarte une posteriorizazion dal as dal russac e consecuent sbelançament anteriôr dal cuarp par no colâ indaûr.
Intal jemplâ il russac al è impuartant che i libris plui grancj e pesants a vegnin sistemâts de bande dal russac che e reste a contat cu la schene, il pês totâl dal russac nol varès di passâ il 10-15% di chel corpori.
Figure 5 - sbelançament dal tronc indenant par vie di un russac cun cjame ecessive e distribuide mâl
Par alçâ in maniere corete il russac di tiere al covente: metisi dongje dal russac e, cuntune base di poie stabile, pleâ lis gjambis, inclinant un pôc il tronc indenant par rivâ fin ae mantie sore dal russac, e cjapâle cun dutis dôs lis mans. Distirâ duncje a planc lis gjambis, continuant a alçâ il russac fin ae poie sul scritori. Par metilu sù e pal traspuart, pleâ in maniere lizere lis gjambis in mût di podêlu meti cence arcâ la schene, cu lis braçadoriis regoladis in mût di distribuî il caric in maniere comude e uniforme su lis dôs spalis. Regolâ la cinture adominâl par mantignî il russac aderent ae regjon lombâr e dorsâl.
Figure 6 – moviments corets
In dì di vuê, tancj fruts a van a scuele cul trolley e cheste modalitât di puartâ il pês e je dal sigûr preferibile. No son ancjemò studis in merit, ma inte nestre esperience o cjatìn che i fruts che lu doprin no sorecjariin la schene ma a puedin lamentâsi di dolôr tes spalis e tal cuel. Di fat, il strissinament dal trolley al compuarte une tension mecaniche ae spale soredut parcè che i fruts a corin, si zirin par fevelâ tra di lôr, a van sù e jù svelt dai marcjepîts. Cun di plui, propit parcè che no sintin intor il pês dal russac, no si preocupin di tropis robis che a metin dentri. Cuant che dopo a scuele si cjatin a vê di fâ lis scjalis tignintlu alçât par diviers seconts, l'impat dal pês si fâs sintî.
Al moment dal acuist al sarà duncje impuartant sielzi il russac o il trolley su la base dal ûs che al fasarà il fi, domandantsi: vadial a scuele a pît o cuntun mieç di traspuart? Cambiial dispès aule e aial di fâ dispès lis scjalis? Ce fisic aial il frut? In ducj i doi i câs, al è impuartant insegnâ al fi cemût che si à di preparâlu e in câs controlâ in maniere periodiche ce che al puarte a scuele. Intal câs dal russac, verificâ che lu meti ben: braçadoriis ben tiradis, il fonts poiât no plui jù de zone lombâr e mai il russac suntune spale sole!
Ce puedino fâ mame e papà pe posture? Par ce che al tocje la posture, la robe plui utile e je chê di fâle cambiâ dispès. Dal sigûr domandâ al frut di sentâsi in posizion corete, cun ducj i doi i pîts poiâts par tiere e cul tronc in linie parsore il bacin e je une buine robe pai moments scolastics o cuant che al mangje. In ogni câs, cheste e je une richieste dificil di rispietâ intai moments di svagament. Se o notais che vuestri fi al reste inte stesse posizion par plui di 20 minûts e la frase tipiche “Metiti ben” no da i efiets sperâts, domandaitji propit di cambiâle. Par esempli, se al è sul divan, al è impuartant fâi alternâ la bande che si distire e il braçâl che al poie il comedon. No stait a preocupâsi di otignî la posizion perfete, ma pontait su la varietât. In cheste otiche al è ben visâsi che praticâ un sport o zuiâ tal viert intal timp libar a son bogns aiûts ancje dal pont di viste posturâl, parcè che a evitin il mantigniment par masse timp di posizions scoretis, e a sigurin al frut une mobilitât globâl dal sisteme muscolâr e scheletric che al è fondamentâl par une cressite corete e pe prevenzion dal dolôr. Cun di plui, cui che al pratiche sport in maniere regolâr al à un nivel di fuarce che i permet di percepî tant che lizêr ancje un russac pesant e al à une resistence che i permet di traspuartâlu cence problemis.
Cence dubi, par otignî risultâts zovevui inte prevenzion dal mâl di schene, si à di intervignî su varis nivei, in particolâr la scuele, motivant i insegnants a programâ lis justis polsis cuotidianis di moviment pal cambi di posizion o une ativitât tal viert o in palestre. Competence dai insegnants e je ancje la sielte dai libris scolastics: al è ben sielziju no dome su la fonde de lôr validitât didatiche, ma ancje dal lôr pês, evitant l'ûs di libris di test trienâi.
No si àn di trascurâ altris doi ponts di cheste cjadene dal caric su lis spalis dai fruts: lis cjasis editoris che a puedin ridusi il pês de cjarte doprade e produsi tescj a fassicui; lis ditis produtoris di russacs che a puedin di une bande introdusi in cumierç pai fantats dome russacs ergonomics, di chê altre a puedin distribuî insiemi cui russacs materiâl cognossitîf specific.
torne sù
stampa