Ingjestion di batariis: un pericul grâf

batterie

La ingjestion di une disk battery o di une button battery, al liti o alcaline, e je une urgjence mediche che e pues jessi gjestide dome intun ospedâl che al vedi miedis adestrâts a fâ une endoscopie di urgjence e chirurcs dal toraç e vascolârs di provade esperience.

O stin fevelant di chês batariis che a somein monedis o botons. A son une vore dopradis par: orlois, machinis fotografichis, telecomants, calcoladoriis, aparâts acustics, zûcs eletronics, struments varis.

Dispès il doprât al ven abandonât ator pe cjase pensant che nol sedi pericolôs ma nol è par nuie cussì; cun di plui e je la abitudin di comprâ plui di une, par sparagnâ un viaç tal negozi, e chê o chês in plui no vegnin custodidis cu la cure dovude metintlis in puescj no acessibii ai fruts. Po dopo e je ancje la naturâl curiositât dai fruts che a cirin di dismontâ dut, e la batarie no si sa parcè e je simpri une vore interessante, e la lôr tindince a meti dut in bocje ma ancje tal nâs o tes orelis.

Chestis batariis a vegnin cun facilitât localizadis cuntune radiografie dal toraç che e permet ancje di

distinguilis di botons e monedis. Par solit di une bande a son slissis, invezit di chê altre e je une scanaladure circolâr, a fîl dal ôr.

 

CONSECUENCIS IMEDIADIS

Il dam al è causât par causticazion (gjenerazion di corint e compression mecaniche) e lis consecuencis imediadis a son la distruzion des parêts dai orghins ingjâfs e dai vâs arteriôs o venôs dongje di chescj. Se a jessi lesionade e je une grande arterie la emoragjie par solit e je fatâl.

Lis batariis ingjeridis a puedin rivâ tal stomi o incjastrâsi tal esofac.

Gjavâ une batarie dal stomi, cu la endoscopie o in maniere chirurgjiche, e je une procedure a vonde facile. Cun di plui tal stomi il control de situazion e la riparazion dai dams eventuâi a son une vore plui facii che intal esofac.  

L’esofac al è riparât dentri de scjaipule toraciche che e rint l’acès une vore plui dificil. E la riparazion no je simpri cence complicazions che dispès a bisugnin di altris intervents une vore complès. Al è clâr che la cualitât de vite di une persone che e à subît chescj intervents no je chê di prime. Ancje riparâ une grande arterie intratoraciche nol è facil ma par solit si rive.

 

CONSECUENCIS A LUNC TIERMIN

Si pense che dut al sedi lât dret e invezit dopo di cualchi setemane a vegnin fûr disturps dal passaç tal esofac cun sens di fermade dal mangjâ te sede retrosternâl e ingomit causâts de streture dal lumen par inflamazion croniche. 

I sintoms a son simpri tardîfs e no specifics. La cause e je scuvierte dai aciertaments programâts. Par solit a son nausie, ingomit, fastidi toracic, inapetence, astenie, emoragjie.

Se o rivìn a gjavâ la batarie dentri di dôs oris, event une vore ecezionâl, al è pussibil che le vedin scjampade e o podìn stâ solevâts.

Se a son passadis plui di dôs oris il dam causât al pues rivelâsi une vore grâf e duncje l’intervent al va fat in sale operatorie cun ducj i specialiscj dal câs presints.

 

Gjenitôrs, ATENZION! Cu lis batariis no si scherce.   

torne sù
ultime modificazion: August 29, 2018 Coments / Sugjeriments