Ambulatori di medisine dai viazadôrs
II viaçs a ufrissin la ocasion di esperiencis inmagantis e di no podê dismenteâ. In ogni câs, a esponin ancje a pericui infetîfs no indiferents par frecuence e cualchi volte par gravitât; la plui part di chescj pericui e pues jessi ridusude in maniere sensibile cuntune buine preparazion dal viaç stes, cuntun compuartament resonevul e prudent, cu la aplicazion di misuris preventivis semplicis. I viazadôrs a puedin cjapâsi cure de proprie salût cognossint i pericui e informantsi su lis misuris par protezisi tai ambulatoris di medisine dai viazadôrs.
In chest ambulatori al è pussibil:
• otignî lis informazions necessariis su lis misuris di profilassi individuâl;
• fâsi fâ lis vacinis internazionâls obligatoriis e racomandadis;
• fâsi prescrivi i farmacs pe prevenzion dai pericui infetîfs potenziâi (tant che la malarie e la dissentarie dal viazadôr).
Il pericul di esposizion aes malatiis al è, di fat, determinât di tancj fatôrs: de etât e de salût di ogni viazadôr, des cundizions fisiologjichis, de destinazion precise dal viaç e dal itinerari (regjon visitade, se e je rurâl o urbane), dal lozament, dal motîf, de durade e dal gjenar di viaç (organizât o no). Lis informazions di caratar sanitari a varessin di jessi domandadis cun anticip suficient a vê lis vacinis necessariis (almancul un mês, in ciertis situazions particolârs ancje fin a trê - sîs mês prime). Une consultazion preventive, invezit di prospetâ pericui di vê pôre, e podarà contribuî a fâ plui plasevul il vuestri viaç.
Par acedi al ambulatori di Medisine dai Viazadôrs al baste prenotâ une visite tal ambulatori di Sanitât Publiche al call center regjonâl (0434 223522) indicant la sede di:
• GLEMONE: Ambulatori di Sanitât publiche tal Ospedâl locâl
• TUMIEÇ: Ambulatori di Sanitât publiche tal Ospedâl locâl
• SANT DENÊL: Ambulatori di Sanitât publiche tal Ospedâl locâl
• CODROIP: Ambulatori di Sanitât publiche tal Distret locâl
"Se parto per…”
“Se parto per…”e je une vuide che e permet a ducj i citadins iscrits e a cjame dal Servizi Sanitari Nazionâl di vê informazions sul dirit o mancul ae assistence sanitarie dilunc di une permanence intun cualsisedi paîs dal mont.
In particolâr, e permet di vê informazions su cemût otignî la assistence sanitarie intun cualsisedi paîs dal mont, a cui indreçâsi, cemût domandâ eventuâi rimbors.
- "Se parto per…” (il link al vierç une gnove barconete)
stampa