Telesocors 800 846 079
LA TELEASSISTENCE
CE ISE?
La Teleassistence e je un servizi de Regjon Friûl Vignesie Julie, gratuit o semigratuit su la base dal redit.
Al è un aiût in plui par cui che al vûl vivi sigûr e protet a cjase sô, savint di podê contâ simpri su cualchidun, disponibil e pront in cualsisedi situazion di bisugn o di emergjence, 24 oris su 24.
La Teleassistence e da la libertât di lâ indevant a fâ lis robis di simpri, di jessi indipendents e sigûrs, pûr mantignint lis abitudins cuotidianis.
PARCÈ?
Par sintîsi sigûrs e protets ancje cuant che no si pues vê la presince costante di familiârs o di personis in stât di furnî assistence.
Par dâ ai propris cjârs, anzians o in pericul di isolament, une poie concrete cuant che a son bessôi, e par favorî la autonomie e la vite indipendente.
LA TELEASSISTENCE
CEMÛT FUNZIONIE?
Ogni persone assistude a domicili e ven dotade di un dispositîf telefonic cuntun piçul radiocomant di tignî cun se tal câs di emergjencis. E ricêf telefonadis une o plui voltis la setemane di bande dai operadôrs des centrâls de Teleassistence che a dedichin a ognidun timp e atenzion, favorint il dialic e la socializazion.
Tra operadôr e utent si instaure cussì un rapuart amichevul che al facilite la prevenzion dai bisugns e che al ufrìs un sens di sigurece ae persone assistude, miorant la sô cualitât di vite.
In câs di emergjence (par esempli un mâl improvîs, un piçul incident domestic), al baste fracâ il boton sul telecomant e l'alarme al rive ae centrâl che e jentre daurman in comunicazion in vive vôs cul assistût, e e je in stât di ativâ, 24 oris su 24, ogni dì dal an, la operazion di socors o di aiût plui idonie (par esempli, alarmant familiârs, vicins, il miedi, il 118 o altris jutoris).
Intes capitâls di provincie e comuns dulintor, massime pes personis cence rêt di riferiment, al è disponibil ancje un servizi di custodie des clâfs cun pront intervent in câs di emergjence.
Graciis ae integrazion cui servizis sociâi e sanitaris istituzionâi e dal volontariât, l’utent al è metût ancje inte "rêt" di poie che i operadôrs de Teleassistence a son in stât di ativâ in funzion des esigjencis rilevadis.
LA TELEASSISTENCE
A CUI ISE INDREÇADE?
• Ai anzians che a vivin bessôi o che a restin par tantis oris bessôi a cjase;
• Aes personis no dal dut autosuficientis;
• Aes personis disabilis;
• Aes personis a pene dimetudis di struturis ospedalieris, che a àn bisugne di assistence post ospedaliere;
• Ai anzians in liste di spiete pal ricovar in struturis residenziâls;
• Aes personis in cundizions di discomut o di isolament sociâl.
CEMÛT DOMANDÂLE?
Il servizi di Teleassistence domiciliâr regjonâl al è erogât in forme gratuite o semigratuite, in relazion aes cundizions economichis di cui che al fâs domande (o dal nucli familiâr che al fâs domande).
La domande di Teleassistence e va presentade al Distret Sanitari di apartignince.
I modui pe domande a puedin jessi ritirâts tai Distrets Sanitaris o li dai Servizis Sociâi Comunâi o ancje scjariâts dai sîts de Regjon (www.regione.fvg.it), des Aziendis Sanitariis o dal gjestôr dal servizi (http://www.tesanteleveita.it).
Dutis lis informazions su la Teleassistence e su lis modalitâts par otignîle a vegnin furnidis clamant il numar vert gratuit 800 846 079
Regjon Autonome Friûl Vignesie Julie Direzion Centrâl de Salût, integrazion sociosanitarie e Politichis Sociâls
La gjestion dal servizi e je dade in man ae associazion di impresis cun a cjâf TESAN-TELEVITA SRL, cun sede a Udin in vie Manin 16, telefon 0432 272727, e a Triest in place San Giovanni 6, telefon 040 7786111.
www.tesantelevita.it
info@tesantelevita.it
NUMAR VERT 800 846 079
stampa