Azienda per i Servizi Sanitari n. 3 - Alto Friuli

O ripuartìn chi sot l'articul jessût fûr su Panorama Sanitât

Al è online il prin portâl istituzionâl dedicât dal dut al citadin par informâsi, cognossi e sielzi. Al furnìs une corete informazion su la salût scrite intun lengaç clâr, sempliç e acessibil a ducj. “Il portâl, di facile consultazion, al  è organizât” al spieghe l’Iss “in cuatri sezions: La salût A-Z, Stîi di Vite e Ambient e Fals mîts e Bufulis, e a chestis si zonte une sezion News inzornade ogni dì de agjenzie Ansa sui temis di atualitât in medisine e ricercje. Al recapit www.ISSalute.it i esperts dal Istitût Superiôr de Sanitât a àn realizât pal citadin une vere e proprie enciclopedie de salût digjitâl e interative che, cun plui di 1700 schedis fatis su lis causis, i disturps, lis curis, la prevenzion des malatiis e 150 fake news dismascaradis che a deventaran in pôc timp plui di 400. Un sît, inzornât ogni dì, che al ufrìs ai visitadôrs une vere e proprie bussule par orientâsi tal mâr de informazion sientifiche presint tal web”. «Il nestri portâl al nas par spiegâ ai citadins il valôr de ricercje e di dute la cognossince produsude dal Iss e de interie comunitât sientifiche par rindile fruibile al plui grant numar di personis pussibil, cence discriminazion di redit o di nivel di alfabetizazion. O jentrìn in cjamp cuintri lis bufulis online. O volìn ufrî ai citadins che simpri plui spes a consultin il web par motîfs di salût, cjatant dut e il contrari di dut, une rive sigure, un pont di riferiment rigorôs e autorevul. – al dîs Walter Ricciardi, President dal Istitût Superiôr de Sanitât – E je une informazion certificade ae origjin parcè che e je produsude tai stes lûcs là che si fâs ricercje e si prodûs cognossince sientifiche e un contribût ae ecuitât e ae sostignibilitât dal nestri sisteme sanitari».  “Il portâl Issalute” al dîs ancjemò l’Istitût “al è stât costruît par fâ in mût di promovi tai citadins sieltis cussientis e coretis in materie di salût parcè che coerentis cu lis evidencis sientifichis disponibilis. Ma al vûl jessi ancje un strument tes mans dai citadins parcè che a puedin difondi e condividi i contignûts sientifics dentri dai cjanâi disintermediâts come blog e social networks. Daûr dal ultin rapuart Censis ben un talian su trê al navighe in rêt par otignî informazions su la salût. Di chescj, plui dal 90,4% al fâs ricercjis su specifichis patologjiis. A cressin i contats dai cuotidians online (+2,6%) e dai altris portâi web di informazion (+4,9%). In cressite la difusion dai Social Network: a Facebook  al è iscrit il 50,3% de interie popolazion (il 77,4% dai zovins under 30), YouTube al cjape il 42% dai utents (il 72,5% tra i zovins) e Twitter il 10,1%”. «Il portâl de cognossince al è un altri dai pilastris che l’Iss al sta costruint pe difusion de culture sientifiche ai citadins tal nestri Paîs. Si zonte al Museu de Sience inaugurât ae presince dal President de Republiche Mattarella l’an passât e dulà che propit vuê o din il vie ae mostre itinerante “Mondovaccini”, un viaç ae scuvierte di chescj farmacs e dal lôr grant valôr terapeutic te storie. Un museu e une mostre – al finìs Ricciardi – che a fasin part a plen titul di une operazion culturâl e di une educazion sientifiche che une istituzion che e promôf la sanitât publiche no pues gjavâsi di fâ».

FONT: panoramasanita.it