Il Servizi Civîl Nazionâl (SCN), istituît cu la leç dai 6 di Març dal 2001 n. 64 (e che dal prin di Zenâr dal 2005 si davuelç su base dome volontarie) al rapresente un mût dal dut inovatîf di difindi o di "servî" la proprie patrie: al vûl ufrî ai zovins la oportunitât di colaborâ, cun progjets bogns e condividûts in maniere sociâl, al mantigniment e ae difusion dai valôrs che a fondin la Republiche taliane.
Il SCN al pues jessi fat di zovins che a àn citadinance taliane e une etât fra i 18 e i 28 agns, e al dure un an. Il Servizi si realize intal davuelziment di un impegn solidaristic a pro de coletivitât e al garantìs ai zovins une valence educative e formative fuarte, di meti in vore midiant de poie di Ents o di Organizazions increditâts a chest rûl di formadôrs e di referents.
E je une ocasion impuartante di cressite personâl, une oportunitât di educazion ae citadinance ative, un strument preziôs par judâ lis fassis plui debilis de societât, contribuint al disvilup sociâl, culturâl e economic dal nestri Paîs.
Cui che al sielç di impegnâsi par dodis mês intal Servizi civîl volontari, al sielç di zontâ une esperience cualificante al propri bagai di cognossincis, spindibil dilunc de vite di vore, cuant che nol devente fintremai oportunitât di lavôr; intal stes timp, al sigure dut câs almancul une minime autonomie economiche.
Lis areis di intervent là che al è pussibil prestâ il Servizi Civîl Nazionâl si puedin ricondusi ai setôrs: assistence, protezion civîl, ambient, patrimoni artistic e culturâl, educazion e promozion culturâl, servizi civîl tal forest.
Par plui informazions si pues dâ un cuc al sît : www.serviziocivile.it
torne sù
stampa