Azienda per i Servizi Sanitari n. 3 - Alto Friuli

Tal 2017 la AAS3 e à promovût cuntun bon sucès il svilup de Ativitât Fisiche Adatade pe citadinance. In particolâr, dopo i Distrets di Codroip e di San Denêl, dal 2017 la ativitât e je stade inviade ancje tal Distret di Glemone, cun cors ativâts fin a Tarvis, e, di Otubar, ancje tal Distret de Cjargne. Vie pai prins mês dal 2018 altris cors a son stâts inviâts, il plui resint propit dal mês di Jugn cul supuart dal Comun di Mueç.

Us ricuardìn in struc ce che e je la Ativitât Fisiche Adatade, plui cognossude come AFA. La AFA e consist in cors di ativitât motorie indreçâts in particolâr a personis cun problematichis di salût “cronichis”, ma stabilizadis, realizâts di Palestris che a colaborin cu la AAS3 par permeti a plui citadins che si pues di mantignî o miorâ lis propriis cundizions di salût. Ai cors a puedin partecipâ ancje lis personis che a vuelin prevignî o ridusi i problemis leâts aes diviersis fasis de vite, come la menopause e plui in gjenerâl l’invecjament e la tindince ae sedentarietât.

Il miedi di medisine gjenerâl, o i miedis specialiscj, a indrecin ai Centris di riferiment AFA de AAS3 i propris assistûts a fin che, valutade la idoneitât, a sedin inserîts tes palestris che a colaborin pal davuelziment dai cors.

La ativitât e ven fate in maniere bisetemanâl par dut l’an, il cost a caric dai partecipants al è contignût e lis palestris a garantissin la sigurece dei esercizis proponûts in acuardi cu la Aziende Sanitarie.

I dâts de ativitât dal 2017:

• I fisioterapiscj dai 4 Centris di riferiment a àn valutât 769 personis;
• lis palestris che a colaborin a son 24 par un totâl di 54 cors atîfs tal teritori aziendâl.
• plui di 100 miedis a àn indicât ai propris assistûts la impuartance di praticâ ativitât fisiche in maniere regolâr indreçantju ai Centris di riferiment.

La Organizazion mondiâl de Sanitât intai ultins timps e à riclamât la atenzion su la impuartance de ativitât fisiche par prevignî o contignî tantis problematichis leadis ae etât o ae sedentarietât, confermant la eficacie dimostrade pe riduzion dal riscli di problemis cardiocircolatoris, diabete, ipertension, e di ciertis formis di tumôr; diminuzion de ansie, de depression e di ciertis formis di demence.

Il moviment al è element basilâr par une vite in salût, limitant il pericul di colâ, judant il control dal pês e il mantigniment de fuarce muscolâr, de salût dai vues, de agjilitât e de indipendence tes ativitâts de vite cuotidiane. Cence dismenteâ la influence par une vite plene ancje te partecipazion sociâl.

Cui che nol pratiche ativitât fisiche in maniere regolâr, che al domandi al propri Miedi di medisine gjenerâl se la AFA e je indicade!

• AFA [pdf - 804,95 KB] (il link al vierç une gnove barconete)