*_#bognsproponiments2018_* Smeti di fumâ
Ancje se di simpri legalmentri e culturalmentri acetât, il fum di tabac al è la plui difondude e dal dut plui letâl tossicodipendence.
Ogni an in Italie a muerin 80-90.000 personis par patologjiis leadis al fum (par confront, i muarts par dutis lis droghis ilegâls a son 100 voltis di mancul). Il fum di tabac al è duncje la prime cause di muart evitabile.
La prime cause di muart di fum e je costituide des malatiis cardiovascolârs (in particolâr dal infart dal miocardi). La nicotine in fat e aumente la pression dal sanc e e favorìs il formâsi di plachis che a strenzin lis arteriis.
La seconde cause e je rapresentade des patologjiis tumorâls, soredut al polmon (20 voltis plui frecuente tai fumadôrs), a la bocje, a la laringje, a la vissie, ma ancje in tancj altris orghins dal cuarp. Chi la cause no je la nicotine ma il "catram", o sei i cancerogjens che si produsin te combustion.
La tierce cause di malatie e di muart di fum e je la insuficience respiratorie di enfiseme polmonâr, provocât de continue esposizion des viis aeriis aes sostancis iritantis presintis tal fum.
Fumâ al puarte po dopo ancje tancj altris problemis, come bronchite croniche, tos, invecjament precoç de piel, mancjance di energjie par scjarse ossigjenazion dal sanc, problemis sessuâi tai oms, gastrite, problemis circolatoris.
Motîfs par smeti a'nd son duncje une vore (in plui dal cost economic, fumâ al coste in medie 1500 euros al an dome pal acuist dai sigarets).
Smeti al pues jessi dificil, parcè che la nicotine e je, cu la eroine, la droghe che plui facilmentri e cause dipendence, sei psicologjiche che fisiche.
Vuê a son però, ancje gracie ai gnûfs farmacs, percors di cessazion une vore eficaçs, che, bastant che al sedi un clâr desideri di smeti, lu rindin une vore plui facil, eliminant sei il "bisugn" di fumâ sei il disasi di astinence (iritabilitât, malumôr, gnervôs, insonie) che in gjenar al ven dopo de interuzion dal fum e che al puarte spes a tornâ a tacâ.
Cui che al vûl jessi judât a smeti al pues indreçâsi al so miedi, o ancje ai ambulatoris specialistics di tabacologjie che a fasin part dai servizis pes dipendencis.
Inte Aziende Sanitarie n°3 i ambulatoris specialistics pal tabagjisim a son tes sedis dal SerT di Tumieç (tel 0433-488385), di Glemone (tel. 0432-982312) e di San Denêl (tel 0432-949345). L'acès al è gratuit, cence necessitât di impegnative mediche, al è suficient un contat telefonic.
Se tu fumis, smet, o domande aiût par smeti, cence spietâ che lis consecuencis a deventin gravis e ireversibilis.
torne sù
stampa