NO DUT CE CHE AL È NATURÂL AL È SALUTÂR: RISCLIS DI INTOSSICAZION ALIMENTÂR LEÂTS AE RACUELTE DI JERBIS SPONTANIIS DI DOPRÂ IN CUSINE
Sclopìt, ardielùt, urtiçon, confenon, radicèla, rusculins, barbe di bec, pêl di mus, lidric di mont… chestis a son dome cualchidune des jerbis salvadiis che intun passât no masse lontan i nestris nonos e antenâts a dopravin come impuartante font di nudriment.
Propit come in tantis altris parts de Italie, la racuelte di jerbis spontaniis di doprâ in cusine e jere in fat une abitudin une vore difondude in Friûl Vignesie Julie. A partî dal moment dal disglaçament fin indenant te Vierte, lis feminis e i fruts a dedicavin une vore di timp ae ricercje di zermueis e di plantutis a pene spontadis. La capacitât di ricognossi e distingui lis speciis e lis varietâts di jerbis comestibilis e jere part integrante dal bagai culturâl popolâr e e vignive tramandade di gjenerazion in gjenerazion.
Cul passâ dai agns la industrializazion, il benstâ economic, l’aument de cuantitât e cualitât dai servizis al à puartât par sigûr a un miorament des cundizions di vite. Dut câs chest al à ancje determinât gravis consecuencis tantis voltis sotvalutadis come il sfrutament impropri dal teritori e des risorsis naturâls e la pierdite di ûs, costums e tradizions secolârs. Pocjis a son in fat lis personis che al dì di vuê a san ricognossi lis plantis che a cressin tes nestris campagnis e tai nestris boscs e che une volte si cirivin e si cjapavin sù in maniere ative.
Cjapâ sù jerbis salvadiis, baulis, pomis e foncs tal cidin dal bosc o tal mieç dai prâts florîts e rapresente une biele emozion e ancje un salutâr esercizi al aiar viert. Une volte a cjase ancje la trasformazion di ce che si è cjapât sù in gustôs plats e permet un tornâ dongje ae “nature”. Dut câs la ricercje di chestis bielis sensazions e pues esponi i improvisâts racueidôrs di jerbis e plantis a risclis ancje une vore elevâts, che a rivin a paiâ il presit de disinformazion e de mancjade esperience cun intossicazions a esit a voltis fatâl.
Pensait par esempli a cualchi recent fat di croniche: a om e femine di setante agns muarts par vê mangjât un risot cusinât cuntune rose tossiche (Colchicum autumnale) scambiât par zafaran salvadi (Crocus sativus) e ae famee interie che e je finide in ospedâl par intossicazion dopo vê mangjât une confezion di spinazis che a contignive par erôr une jerbe infestante velenose, la mandragore.
Par sensibilizâ la popolazion sui risclis leâts ae ingjestion di aliments contaminâts o che a contegnin tossinis naturâls che a puedin jessi une vore pericolosis pe salût umane il Centri Antivelens di Milan, l’ATS de Brianze e l’IZSLER, in colaborazion cul Ministeri de Salût, la Regjon Lombardie e l’Ospedâl Niguarda, a àn publicât tal 2016 une vuide cul titul “Lis intossicazions alimentârs di tossinis naturâls: vuide al ricognossiment e ae prevenzion“
(estrat di: http://www.salute.gov.it/imgs/C_17_pubblicazioni_2537_allegato.pdf).
Cheste publicazion e sclarìs cuâi aliments in nature a puedin jessi danôs pe salût (plantis, foncs, pes, e v.i.) e e furnìs sugjeriments su cemût compuartâsi in câs di intossicazion.
Tal Autun dal 2017 ancje il CeIRSA – Centri interdipartimentâl pe ricercje su la sigurece alimentâr de Regjon Piemont – al à publicât online un interessant opuscul informatîf su lis intossicazions alimentârs causadis di tossinis naturâls presintis tai vegjetâl (estrat di: http://www.ceirsa.org/leggitutto.php?idrif=812).
Cul aiût e il riferiment des dôs vuidis citadis parsore si ripuarte chi sot cualchi piçul consei su cemût ricognossi cualchidune tra lis plantis plui ricercjadis e dopradis te cusine tradizionâl furlane, su cemût identificâ e no scambiâ par comestibil cualchidun dai vegjetâi plui pericolôs e su cemût compuartâsi in câs di suspiet invelenament.
Us visìn che chest document al rapresente une semplice vuide ilustrative e che dome il ricognossiment botanic de bande di un espert al è fondamentâl e indispensabil par efetuâ une corete valutazion dal riscli tossicologjic tai câs di ingjestion di un vegjetâl no ben cognossût. Al è ben duncje no improvisâsi racueidôrs di jerbis cence cognossilis ben par evitâ di cori il riscli di meti tal plat speciis velenosis, a voltis mortâls, di aspiet une vore simil a chês comestibilis. Si consee di svicinâsi ae ativitât di racuelte des jerbis salvadiis frecuentant cors specifics in materie, miôr se cun jessudis pratichis sul cjamp, e limitâsi al inizi a distingui e ricognossi in maniere sigure pocjis speciis par volte.
RicoGnosSI lIS speciIS pLUI ricercJaDIS e DOPRADIS TE cuSinE tradizionÂL fURLANE.
Chi sot si ripuarte cualchidune tra lis plui ricercjadis e preseadis jerbis spontaniis tipichis de tradizion furlane. O cjolìn la ocasion par ricuardâ che par impedî la racuelte indiscriminade di chestis jerbis in Friûl Vignesie Julie e je stade emanade une leç regjonâl (L.R. n.9 dai 23 di Avrîl dal 2007 e modifichis seguitivis) che e fisse periodis e limits cuantitatîfs di racuelte diviers a seconde des variis speciis. Al è impuartant in fat svicinâsi ae nature cun profont rispiet lassant la pussibilitât ancje a lis futuris gjenerazions di cognossi e preseâ i siei regâi.
torne sùSclopìt (Silene vulgaris)
Par Talian silene, piçule plante peren erbacie cognossude in cualchi zone cul tiermin sclopìt par vie dal rumôr che si prodûs scliçant la rose tra lis mans, invezit in altris bandis e ven clamade grisolò, grisulò, grisu, grisel pal colôr che al va sul grîs arint des fueis. La part comestibile de plante e je rapresentade da lis fueis basâls che a àn di jessi cjapadis sù prime dal periodi de floridure parcè che dopo a tindin a deventâ masse duris. Cheste plante e je une vore cognossude e preseade fin de antichitât pal so bon savôr dolç e delicât che le rint adate a diviers ûs in cusine. E pues jessi in fat doprade par preparâ fertaiis, risots o sopis e si pues consumâ ancje crude te salate.
torne sù
Ardielùt (Valerianella locusta)
Par Talian valerianella, e je une plante comestibile vuê coltivade ancje su largje scjale. In Friûl e ven clamade ancje, argelùt, argjelut, lardielùt. La intensitât dal savôr e la consistence des fueis des plantis coltivadis no son compagnis a chês de stesse specie cressudis al stât spontani.
torne sùLidrichesse (Taraxacum officinale)
Par Talian tarassaco, e je une plante erbacie ubicuitarie cognossude ancje cui nons di radicèla, ridicèla, pissecìan. Dutis lis parts de plante a son comestibilis e buinis. Lis fueutis zovinis crudis si puedin zontâ tes salatis mistis. Lis zovinis plantutis interiis e lis rosutis basâls a vegnin par solit consumadis lessadis e dopo cuinçadis cun vueli extravergjine di ulive, o saltadis in padiele cuntun scaltrît di cussinet, panzete o ardiel. Cui botons floreâi imadûrs a vegnin preparâts i “capars furlans”, scotâts tal asêt e vin e dopo conservâts sot vueli. Lis rosis si puedin preparâ in pastele e fritis o a puedin jessi dopradis par preparâ une bevande simile al vin verduç.
torne sùUrtie (Urtica dioica)
E je une plante une vore difondude che si cjate ad ôr des cisis, tai trois, dongje des cjasis, soredut tes zonis ombrosis. E à un pêl che, cuant che al ven tocjât al bute fûr un licuit che al cause brusôr e pice a oms e animâi, e par cheste rason e je clamade urtie, urtia. I zermueis e lis fueis ancjemò tenaris si cjapin sù in Primevere, prime de floridure e la cuete e disfe i pêi urticants. E à un savôr fuart e decîs e e ven doprade par preparâ sauridis mignestris, fertaiis e risots.
torne sùPapavar (Papaver rhoeas)
Plante erbacie anuâl une vore difondude in planure che e cres ad ôr des stradis e des feroviis e e devente infestante tai cjamps coltivâts. In Friûl si cjape sù il bâr di fueis che si svilupe tor ator de lidrîs in primevere, cuant che la plante e je ancjemò piçule e ben lontane de floridure. Al ven par solit consumât come contor bulît e dopo saltât in padiele, cognossût cul non di “confenòns”, ma al jentre ancje te preparazion di gustosis fertaiis, sopis e risots. Lis fueis de plante zovine, che no vedi ancjemò butât fûr il fust de rose, a son otimis di gustâ ancje crudis inte salate.
torne sùPêl di mus (Chenopodium bonus Henricus)
par Talian spinacio selvatico o Buon Enrico. Plante erbacie bienâl une vore comun che e cres soredut su terens umits e rics di azôt. Si cjate in fat sui prâts, sui pascui di montagne e dongje des malghis. Par furlan e je cognossude ancje cui nons di scùntic, jerbo da’ farino, gàsala, gàzala. In cusine si doprin soredut lis fueis basâls plui zovinis e tenaris che a puedin jessi cusinadis e cuinçadis come spinazis o dopradis par preparâ gustôs riplens o fertaiis golosis.
torne sùLidric di mont (Cicerbita alpina)
Forsit une des plantis plui cognossudis e preseadis dal arc alpin orientâl e in particolâr des Alps Carnichis. Par furlan e je cognossude ancje come latisùl salvadi, radichesse di mont, radìc di mont, radìc dal ors. Si cjapin sù soredut i zovins zermueis prime che a cressin masse, se no no si puedin doprâ a cause dal lôr savôr une vore amâr (tal mês di Mai a son dome dôs o trê lis setemanis utilis pe racuelte). I zermueis a puedin jessi consumâts sei crûts che cuets, in abinament cun insacâts o scuete fumade pe preparazion di gustôs stuzighets, doprâts in risots e fertaiis, o conservâts sot vueli dopo jessi stâts sboentâts in aghe e asêt.
torne sùAi salvadi (Allium ursinum)
Par Talian aglio orsino o selvatico. Plante erbacie, bulbose, spontanie, peren e comestibile. In primevere tai sotboscs e pues creâ grancj tapêts jerbôs, che il lôr profum al è cussì fuart che par tradizion si dîs che al fasedi sveâ i ors dal letarc. Lis fueis a son lungjis e a vonde largjis, di un biel vert slusint. Lis rosis a son blancjis metudis adun intune ombrenute insom il fros. In cusine si pues doprâ come l’ai tradizionâl o si puedin doprâ lis fueis frescjis par preparâ fertaiis, risots e un pestât une vore gustôs.
torne sùUrtiçon (Humulus lupulus)
Par Talian luppolo. E je une plante che e cres in maniere spontanie vie pai cors di aghe e ad ôr dai boscs, sei in planure che viers lis montagnis. Lis zovinis butadis des plantis, in gjenar cognossudis a seconde de zone cul non di urtizzòn, urtiçon o bruscandui, a vegnin cjapadis sù in primevere (da Març a Mai) e dopradis come ingredient pe preparazion di risots, fertaiis o sopis.
torne sùRuscli (Ruscus aculeatus)
Par Talian pungitopo. Plante a baraç simpriverde difondude soredut tes zonis culinârs e boschivis. I zermueis, cjapâts sù tal periodi di Març a Mai, par furlan a vegnin clamâts ruscolin, sparc di ruscli o sparesi de rust, e consumâts in cusine come se a fossin sparcs, lessâts e doprâts come contor a ûfs dûrs, o doprâts in risots e fertaiis. I zermueis a puedin ancje jessi doprâts par aromatizâ la sgnape.
torne sùBarbe di bec o penàc (Aruncus dioicus)
Par Talian asparago di monte o barba di capra. Robuste plante erbacie, peren, plene di fueis, alte fin a 2 metris e caraterizade di rosis profumadis. E cres soredut tai boscs umits-frescs submontans e in zonis no masse sot soreli. I zovins zermueis in Primevere a àn un colôr sul ros e a cressin sot des plantis che si cognossin daurman pai rescj de floridure dal an prime visibile insom la plante in forme di rap. Lis zovinis butadis, se cjapadis sù par timp (dentri di Avrîl), a son une vore indicadis par preparâ fertaiis, sopis, risots o par jessi conservadis sot vueli.
torne sùSparc salvadi (Asparagus acutifolius)
Par Talian asparago spinoso. Plante arbustive, simpriverde peren che e cres une vore tes zonis Carsichis e tes zonis Maritimis. La part comestibile e je costituide di zovins zermueis o turions (sparc salvadi) che a vegnin in gjenar consumâts lessâts e acompagnâts a ûfs dûrs o doprâts par fâ risots e fertaiis.
torne sùCINC ERÔRS MORTÂI: CUANT CHE UN SCAMBI TRA PLANTIS AL PUES VÊ ANCJE UN ESIT FATÂL
Come za dit prime tantis plantis comestibilis a somein o a puedin jessi confondudis cun plantis velenosis o tossichis. Prime di imparâ a ricognossi jerbis, pomulis e plantis comestibilis al è ben duncje imparâ a ricognossi chês plantis che, a seconde des circostancis, stadis di svilup, ûs impropri o cuantitâts ingjeridis, a puedin vê un efiet tossic o in cierts câs fintremai letâl.
torne sùCjampanute scambiade par lidric di mont
par Talian aconito (Aconitum napellus), e je une plante peren une vore difondude tes zonis di montagne des Alps. La cjampanute si ricognòs cun facilitât pes fueis une vore incidudis e pal tipic penac di rosis blu-viole o zalis, ma un voli pôc espert al podarès confondilu cul lidric di mont (Cicerbita alpina).
La cjampanute e je une des plantis plui tossichis de flore taliane: dutis lis parts de plante a àn alcaloits une vore tossics che a agjissin sul sisteme gastroenteric, cardiovascolâr e sul sisteme gnervôs centrâl e periferic.
La ingjestion acidentâl di dosis di aconitine inferiôrs ai 6 mg e je suficiente a causâ la muart di un om adult. La intossicazion e je une vore rapide e si manifeste cuntune cumbinazion di sintoms cardiovascolârs (palpitazions, dificoltât di respirâ, ipotension, bradicardie, tachicardie, aritmie ventricolâr, edeme polmonâr), sintoms gastroenterics (nausie, gomit, salivazion bondante, dolôr adominâl, diaree) e disturps sensoriâi e motoris (comparse di pice e infurmiament che de bocje si slargje a dute la muse e dopo de ponte dai dêts e va dilunc i articui cun tindince a slargjâsi a dut il cuarp fin ae complete anestesie, fluscament de sensibilitât dai orghins di sens, agjitazion psico-motorie, muart par paralisi respiratorie).
Fenomens di iritazion e intossicazion lizêrs si puedin verificâ ancje dome tocjant la plante parcè che i principis atîfs a puedin jessi assorbîts ancje cu la piel.
Câs di invelenament des bestiis a son stâts ripuartâts ancje de medisine veterinarie, dut câs in gjenar i animâi a imparin a selezionâ e evitâ di assumi lis plantis tossichis.
L'ingestione accidentale di dosi di aconitina inferiori ai 6 mg è sufficiente a causare la morte di un uomo adulto. L’intossicazione è molto rapida e si manifesta con una combinazione di sintomi cardiovascolari (palpitazioni, difficoltà di respiro, ipotensione, bradicardia, tachicardia, aritmia ventricolare, edema polmonare), sintomi gastroenterici (nausea, vomito, salivazione abbondante, dolore addominale, diarrea) e disturbi sensoriali e motori (comparsa di prurito e formicolio che dalla bocca si estende a tutto il volto e poi dalla punta delle dita progredisce lungo gli arti con tendenza ad estendersi a tutto il corpo fino alla completa anestesia, ottundimento della sensibilità degli organi di senso, agitazione psico-motoria, morte per paralisi respiratoria).
Fenomeni di irritazione e intossicazione lievi si possono verificare anche solo toccando la pianta poiché i principi attivi possono essere assorbiti anche attraverso la pelle.
Casi di avvelenamento del bestiame sono stati riportati anche dalla medicina veterinaria tuttavia in genere gli animali imparano a selezionare ed evitare di assumere le piante tossiche.
torne sùFals zafaran confondût cul zafaran o cul ai salvadi
Par Talian colchico (Colchicum autumnale), e je une plante erbacie autunâl, velenose, caraterizade di vistosis rosis colôr rose-viole. A diference dal comestibil zafaran vêr (Crocus sativus), plante de famee des Iridaceae, il fals zafaran de famee des Liliacee, al è velenôs e al conten la alcaloide colchicine.
Il colôr viole di ducj e dôs lis rosis al pues puartâ a confondi lis dôs plantis, dut câs il vêr zafaran nol cres cuasi mai tal Nord de Italie e al presente trê stams, o stigmis, invezit il fals zafaran a’nd à sîs.
La colchicine presinte tal fals zafaran, in dosis farmacologjichis e à proprietâts antiinflamadoriis, ma se la plante e ven ingjeride in maniere acidentâl e pues compuartâ une grave intossicazion cun esit fatâl se no ricognossude in timp. Tra i sintoms causâts di chest alcaloit si àn brusôr ae bocje, nausie, gomit, diaree cun sanc, aument de frecuence cardiache e dolôrs al toraç. I prins sintoms a rivin in maniere precoce, za dopo 2-5 oris de ingjestion de plante, e dopo 24 oris si à l’insorzi di fiere e insuficience epatiche e renâl.
torne sùFueis dal colchium scambiadis par ai salvadi
In Primevere un altri erôr dal dut di evitâ al è chel di scambiâ lis fueis dal fals zafaran cun chês dal ai salvadi. Lis fueis dal ai salvadi, in plui di jessi caraterizadis di un fuart odôr di ai, a son pedunculadis e a vegnin fûr de tiere in maniere individuâl cuntun fros fin che si distinc ben de fuee di forme elitiche. Lis fueis dal fals zafaran a son sessilis, a cressin dretis dal tubar cence fros, a àn forme lanceolade e a son cence odôr. L’ai salvadi si pues confondi ancje cu lis fueis dal mughet (Convallaria majalis): chestis a presentin però une forme lanceolade, a son cence il stoc e si pandin dretis dal fust centrâl de plante infodrantlu dilunc de sô altece. Lis fueis dal mughet a presentin un elevât contignût di glicosits a ativitât cardiotoniche; l’invelenament par ingjestion acidentâl di chestis fueis si manifeste cun dolôrs adominâi, nausie, gomit, disturps cardiacs che se no curâts daurman a puedin rivâ fin al come e ae muart.
torne sùMandragore scambiade par buraze
La mandragore (Mandragora autumnalis) e je une plante peren, de famee des Solanaceae, che la lidrîs e rive a dimensions notevulis (fin a 60 centimetris e plui) e e à une carateristiche forme ramificade e antropomorfe. Lis fueis a son di colôr vert intens, a àn un aspiet cuasi “di blede” cun ôr ondulât e cun gnervadure centrâl une vore marcjade e a son metudis a formâ une rosute centrâl là che, in Autun, si forme une infloressence di rosis a forme di plere cun cinc lobis di colôr celest viole intens e luminôs. La floridure e je une vore lungje e e va indenant par dut l’Invier. Lis pomis a son pomulis ovâls di colôr zâl naranç, cu la dimension che e varie di 2 a 4 centimetris.
Tal passât a son stadis atribuidis numerosis proprietâts magjichis ae mandragore, che ancjemò vuê e je cognossude te tradizion popolâr come une des “jerbis des striis” e che e vignive doprade cun finalitât lenitive, analgjesiche, anestetiche, afrodisiache e alucinogjene.
La tossicitât de mandragore e je causade sal so contignût di alcaloits tropanics. Tra chestis i principâi a son rapresentâts di L-iosciamine, atropine e scopolamine. Chescj alcaloidis a son in grât di produsi efiets tossics a caric di diviers orghins e distrets (sisteme gnervôs centrâl, aparât gastroenteric, sisteme cardiovascolâr, e v.i.). La sintomatologjie dal invelenament di mandragore e je caraterizade de comparse di secjece de bocje, vision fluscade, aument de temperadure corporie e dal ritmi cardiac, sumiere, inzirli, mal di cjâf, confusion mentâl, deliri e alucinazions. Tai câs plui grâfs, la ingjestion di mandragore e pues puartâ al come e fintremai ae muart.
Si scuen duncje prestâ une vore di atenzion a no scambiâ par mandragore la buraze (Borago officinalis), une plante erbacie comestibile e che e ven doprade pe preparazion di mignestris, fertaiis, risots e riplens par rafioi. La buraze e je une plante ramificade, cun fust spes e pelôs, che e pues rivâ 50 centimetris di altece. Lis sôs fueis a son duris, ovâls, di colôr vert scûr, cui margjins ondulâts e cuviertis di une fite lanete. Lis rosis di colôr blu- viole intens a son piçulis, metudis a rap e a forme di stele.
torne sùBelladonna scambiade par cernicule
La belladonna (Atropa belladonna) e je la plui famose e cognossude tra lis “jerbis des striis”: a cause des alucinazions e dai disordins psicomotoris (movimentis stereotipâts di danze, ridadis, berladis e sensazions di levitazions) che si manifestin in chei che la ingjerissin, si pense in fat che i rîts satanics dai sabba des striis a fossin il risultât de assunzion di belladonna.
Il non di cheste plante al presente un clâr riferiment a Atropa, une des Parchis de mitologjie greghe che e veve il compit di taiâ il fîl de vite, propit par ricuardâ come la ingjestion des pomulis di cheste plante e pues jessi letâl. L’epitet comun belladonna al derive invezit dal ûs cosmetic che lis feminis dal rinassiment a fasevin di cheste plante: il sûc des pomulis al vignive in fat doprât par miorâ il colôr de muse e par dilatâ lis pipinis dant risalt e lusôr ai voi (efiet cognossût cul tiermin di midriasi e causât dal principi atîf atropine che al è stât isolât de plante in timps ben plui resints).
La intossicazion di belladonna e je caraterizade di une prime fase ecitatorie e alucinatorie e dopo a rivin i classics sintoms dal invelenament muscarinic: dilatazion des pipinis, secjece de bocje, rossôr de piel, disturps cardiocircolatoris e in fin paralisi respiratorie. I efiets tossics de belladonna a son causâts de presince di alcaloits tropanics (atropine, scopolamine, iosciamine) che a vegnin sintetizâts tes lidrîs e dopo traslocâts tal rest de plante, soredut tes pomis e tes semencis, come in tantis des plantis che a apartegnin a lis Solanaceae.
La plante di Atropa belladonna e presente un fust robust e ramificât e e rive a une altece comprendude tra i 70 e 150 cm. Lis fueis a son lungjis ancje 15 cm e a àn une forme lanceolade. Lis rosis a son piçulis, pendulis e a àn un colôr viole e une forme a cjaliç. La pome e je une pomule nere, lucide, cun tante semence e contornade di un cjaliç viert a stele. La plui part dai invelenaments di belladonna e je a caric dai fruts, che no cognossint la plante, a cercin lis pomulis scambiantlis cu lis plui comunis pomis dal sotbosc. A ingriviâ la probabilitât di ingjestion, al è ancje il fat che, jessint une pome che e conten alcaloits, invezit no à un savôr masse garp.
La plante di cernicule (Vaccinum myrtillus) e je un piçul arbossit cun fueis deciduis che si slargje plui in orizontâl che in verticâl rivant a une altece massime tra i 20 e 60 cm, caraterizât di une cressite une vore lente. La pome de cernicule e je une pomule globose, cjarnose e sugose, di colôr blu-viole che al va viers il neri. La polpe interne e je clare e e à un savôr gradevul e un pôc garbit.
La pome de cernicule no à di jessi confondude, in plui che cun lis pomulis de belladonna, cu la pomule de cussì clamade “ue di bolp” (Paris quadrifolia), plante tipiche dai sotboscs umits caraterizade di vê cuatri fueis ovâls unidis a formâ une forme di stele plane insom di un fust alt 20-30 cm. Al centri des cuatri fueis al salte fûr prime la rose, dopo la pome: une pomule nere-blu di cirche 1 cm di diametri che e somee a un grues asin di ue, par chel il non de plante. Dute la plante e je velenose e e conten diviersis sostancis tossichis (come i glucosits paridine e paristifine), ma la ingjestion di pomulis in particolâr e determine une sintomatologjie serie e dolorose, caraterizade di dolôrs gastrics, colics e angosse.
torne sùCervoi scambiât par gjenziane
par Talian veratro (Veratrum album), e je une plante peren alte fin a 150 cm, cun rizome curt e cjarnôs. Dute la plante, in particolâr il rizome, e risulte velenose sei pal om che pai animâi al pascul pal so elevât contignût in alcaloits tossics (protoveratrine, protoveratridine, germerine, jervine, pseudojervine, rubijervine), resinis e acit chelidonic. L’invelenament di cervoi tal om al è in gjenar causât dal consum di licôrs fats in cjase preparâts cu lis sôs lidrîs invezit che cu lis lidrîs aromatichis e amaris de gjenziane (Gentiana lutea).
La someance tra lis dôs plantis e je in efiets notevule e lis pussibilitâts di confondilis e je ingriviade dal fat che chestis plantis a condividin il stes habitat e a cressin su prâts e pascui di montagne tra i 1000 i 2000 metris di altitudin. Par distingui lis dôs plantis si scuen cjalâ in particolâr la disposizion des fueis sul fust: chês dal cervoi a son alternis (o sei a son dispuestis ognidune a nivei diferents rispiet a lis altris), invezit chês de gjenzianis a son opuestis (o sei a son inseridis sul fust a dôs a dôs, al stes nivel, la une di front a chê altre). Cun di plui il cervoi al à lis rosis verdis o blancjis, invezit la gjenziane e à lis rosis zalis puntinadis di maron. Il riscli di confondi lis dôs plantis al aumente in Autun, moment adat pe racuelte de lidrîs, cuant che lis plantis a son aromai flapidis: in chest câs si scuen cjalâ lis lidrîs che tal cervoi a son a çuf curtis e sutilis, invezit te gjenziane a son costituidis di un lunc rizome cilindric zâl clâr.
I sintoms principâi di intossicazion di cervoi a son costituîts di brusôr ae bocje e al cuel, dificoltât di deglutizion e di respirazion, salivazion bondante, nausie, gomit, diaree, dolôrs colics, inzirlis, cefalee, mancjance di fuarcis. Tai câs plui grâfs ralentament dal pols, che si fâs simpri plui debil, e in fin paralisi respiratorie. La muart e rive, di norme, dentri di dodis oris.
torne sùCEMÛT COMPUARTÂSI IN CÂS DI SUSPIETE INTOSSICAZION
In câs di suspiete ingjestion di plantis spontaniis velenosis si à di evitâ manovris azardadis o compuartaments scorets che a podaressin trasformâ une intossicazion acude, facilmentri risolvibile se ricognossude e tratade in maniere tempestive e adeguade, intune tragjedie a esit fatâl.
Chi sot si ripuarte in maniere schematiche ce fâ e no fâ in câs di suspiete intossicazion.
Ce che nol è di fâ:
- Vuardâsi di personis che a pretindin di jessi espertis che si proponin pal ricognossiment de plante: la identificazion cul non botanic de specie ingjeride e je fondamentâl par valutâ in maniere corete il riscli tossicologjic in câs di ingjestion di une specie vegjetâl velenose. Pes plantis salvadiis in câs di dubis si à di indreçâsi a un espert botanic.
- No provocâ il gomit: provocâ il gomit par eliminâ part dal vegjetâl ingjerît al pues jessi pericolôs, parcè che al pues sucedi che i tocuts di fuee o di pome gomitâts a ledin di traviers provocant il scjafoiament o, tal câs di vegjetâi che a contegnin sostancis iritantis, si verifichi un peiorament des lesions a cause dal dopli contat cu lis mucosis.
- No bevi lat: e je credince popolâr che il lat al sedi un antidot universâl e che al rivedi a agjì disativant dutis lis sostancis tossichis. Chest nol è vêr! Anzit tal câs di sostancis tossichis solubilis tai gras, la assunzion di lat e facilite l’assorbiment e duncje il progredî de intossicazion.
- No spietâ la comparse dai sintoms se si suspiete la ingjestion di une plante tossiche: tra il moment de ingjestion e la comparse dai prins sintoms di intossicazion al passe di solit un ciert interval di timp e al è propit sfrutant chest periodi di latence che a puedin jessi evitadis lis consecuencis plui gravis. Se si suspiete la ingjestion acidentâl di une plante no cognossude o tossiche, o a rivin i prins sintoms ancje dopo de ingjestion di vegjetâi ritignûts comestibii, no stait a spietâ ma intervignît in maniere veloce lant in ospedâl e/o telefonant a un centri antivelens.
Ce che al è di fâ:
- Clamait daurman un centri antivelens: Se al è il dubi di vê ingjerît une plante pericolose clamait daurman un centri antivelens. Par esempli il Centri Antivelens (CAV) di Milan al è atîf 24 oris su 24 par 365 dîs al an clamant il numar 02-66101029. Se no si cognos il non sientific dal vegjetâl, fotografaitlu e, dopo contat telefonic, inviait la foto cuntun sms, mms o e-mail al CAV, che al proviodarà a fâlu ricognossi.
- Cjolêt cjarbon atîf: la assunzion di cjarbon atîf al pues prevignî l’assorbiment dai principis atîfs tossics tal câs presints tal vegjetâl ingjerît. Tignî in cjase cjarbon atîf in polvar al pues duncje jessi di aiût. La assunzion e à in ogni câs di avignî su indicazion specifiche dopo consultazion telefoniche cul CAV.
- Lait a pene pussibil al Pront Socors: se pussibil puartait une o plui porzions dal vegjetâl ingjerît e/o une fotografie tal Pront Socors plui dongje. Se come sintom si è verificât il gomit, conservait il materiâl e puartait ancje chel al Pront Socors.
stampa