POMIS E VERDURE: MANGJE 5 VOLTIS I 5 COLÔRS DE SALÛT!
Pomis e verduris a rapresentin, insiemi cun altris grups di aliments, la base de diete mediteranie che a dut vuê e reste il model alimentâr par stâ in salût in dutis lis fasis de vite.
Studis sientifics a àn dimostrât che mangjâ 5 porzions in dì di pomis e di verduris (o, cemût che al dîs l’OMS, plui di 400 grams in dì www.eufic.org/article/it/page/RARCHIVE/expid/Consumo-frutta-verdure-Europa) al contribuìs a protezi la nestre salût dal pericul di diviersis malatiis. Si pues afermâ duncje che diviers disturps a puedin jessi ridimensionâts cul aiût dal frutarûl!
TROPE A ’ND AIO DI MANGJÂ?
La regule des 5 porzions in dì e je une racomandazion facile di tignî a ments. Cu la regule dal 5 si intindin 2 porzions di verduris e 3 di pomis, tant che minim, ogni dì. Par porzions si intint, par esempli, une pome interie (miluç, piruç, naranç) o 2-3 piçulis (armelins, ciespis), un plat di salate, mieç plat di verduris cuetis e, parcè no, une biele tace di struc o di centrifugât.
PARCÈ SONO IMPUARTANTIS?
La lôr impuartance inte nestre diete e je leade al fat che a furnissin diviersis vitaminis e minerâi, fibris, zucars, ma ancje parcè che a adusin altris components minôrs, definîts fitochimics, che a esercitin une ativitât protetive pe nestre salût. Cualchidun di lôr al è responsabil dal colôr di pomis e verdure.
MA CUÂI COLÔRS?
Un truc par jessi sigûrs di assumi lis diviersis proprietâts nutritivis dai aliments vegjetâi al è basâsi sul lôr colôr. Rivâ a “mangjâ i 5 colôrs” e devente une sfide stimolante e utile pe nestre salût parcè che mangjâ simpri lis stessis robis al vûl dî vê un apuart monoton di nutritîfs e riscjâ il cumul di sostancis che a puedin jessi tossichis intal organisim.
Ve i colôrs che no àn di mancjâ su la taule:
• Vert
• Ros
• Blu-viole
• Blanc
• Zâl-naranç
- Opuscul "Mangje a Colôrs" (il link al vierç une gnove barconete)
- Opuscul "I Colôrs dal Benstâ" (il link al vierç une gnove barconete)
CEMÛT FÂ MANGJÂ LIS 5 PORZIONS DI POMIS E VERDURIS
1 Consume ogni dì i 5 colôrs diviers
2 Puarte cun te inte borse une piçule porzion (20-30 grams) di pomis oleosis e/o secjis par une mirindute svelte
3 Scomence de prime gulizion: une pome inte scudiele dai cereâi o un biel struc a inricjissin il to mangjâ
4 Dopre ortaiis e pomis par preparâ ricetis sauridis
5 Scomence il mangjâ principâl cuntune biele salate di plui colôrs
6 Al to panin zonte verduris tant che pomodoros, salate o cudumars
7 Al lavôr e se tu studis, par cuietâ la fam, mangje une pome o cualchi verdure
8 Ten a disposizion par dute la famee verduris e pomis prontis pal consum
9 Esplore la varietât di pomis e verduris e cîr associazions di savôrs gnûfs e interessants
10 Sielç pomis e verduris di stagjon: a fasin ben ae salût e… al tacuin
POMIS ANCJE A SCUELE
A poie de impuartance des pomis e des verduris, ancje la scuele si propon tant che ambient favorevul par tirâ sù i fruts su la fonde di stîi di vite corets. Tantis scuelis a sostegnin lis “mirindis sanis” a base di pomis e verduris (o aliments sempliçs tant che pan o jogurt) midiant de adesion al progjet ministeriâl “Pomis intes scuelis” (www.fruttanellescuole.gov.it), o garantint la ufierte di pomis traviers acuardis cul Comun, cui gjenitôrs, cu lis ditis di ristorazion. Cun di plui, ancje in mense al ven garantît un gustâ ecuilibrât che al contegni ogni dì pomis e verduris, tant che sugjerît des liniis vuide de ristorazion scolastiche nazionâl e regjonâl.
- Publicazion "Ristorazion Scolastiche Nazionâl" (il link al vierç une gnove barconete)
- Publicazion "Ristorazion Scolastiche Regjonâl" (il link al vierç une gnove barconete)
stampa